Bugun, 22-noyabr kuni Dushanbe shahrida "Yevropa Ittifoqi - Markaziy Osiyo" shaklidagi 17-vazirlar uchrashuvi bo‘lib o‘tdi.

O‘zbekiston TIV Matbuot xizmati xabariga ko‘ra, tadbirda Qozog‘iston, Qirg‘iziston, Tojikiston, Turkmaniston, O‘zbekiston tashqi ishlar vazirlari hamda Yevropa Ittifoqining tashqi ishlar va xavfsizlik siyosati bo‘yicha Oliy vakili ishtirok etdi. 

Unda Yevropa Ittifoqi va Markaziy Osiyo mamlakatlari o‘rtasidagi munosabatlarning dolzarb masalalari muhokama qilindi.

Tadbirda O‘zbekiston Tashqi ishlar vaziri Abdulaziz Kamilov ham so‘z olib, o‘z nutqida Markaziy Osiyo va Yevropa Ittifoqi o‘rtasidagi hamkorlikning innovasion modelini shakllantirish, uzoq muddatli istiqbolda yangi o‘sish nuqtalarini aniqlash bo‘yicha qat’iy choralarni amalga oshirish muhimligini ta’kidladi. 

Tariflarni uyg‘unlashtirish, bojxona tartiblarini soddalashtirish, barcha biznes subektlari uchun teng sharoitlar yaratish, raqamli texnologiyalardan samarali foydalanish, transport-kommunikatsiya loyihalarini amalga oshirish orqali hududlararo va mintaqalararo savdo-iqtisodiy aloqalarni faollashtirish uchun keng imkoniyatlar mavjudligi qayd etildi.

Afg‘onistonda gumanitar falokatning oldini olish, mamlakatni mintaqaviy iqtisodiy jarayonlarga jalb etish, afg‘on tomoni bilan konstruktiv muloqotni yo‘lga qo‘yish bo‘yicha tezkor va o‘zaro kelishilgan chora-tadbirlarni amalga oshirish zarurligi ta’kidlandi.

Uchrashuv ishtirokchilariga O‘zbekiston tomonidan yashil iqtisodiyot tamoyillarini joriy etish, ekologiya va bioxilma-xillikni saqlash, tabiiy resurslardan oqilona foydalanish borasida amalga oshirilayotgan chora-tadbirlar haqida ham ma’lumot berildi. O‘zbekiston tomoni Yevropa Ittifoqi bilan ushbu yo‘nalishdagi aloqalarni, jumladan, BMTning Orolbo‘yi mintaqasi uchun inson xavfsizligi bo‘yicha ko‘psheriklik Trast fondi doirasida hamkorlikni kengaytirishga tayyorligi bildirildi. 

Uchrashuv yakunida Qo‘shma kommyunike qabul qilindi.

• Markaziy_Osiyo