O‘zbekiston Respublikasi DXX Surxondaryo viloyati boshqarmasi xodimlari fuqaro A.A.ga nisbatan to‘plangan tergovga qadar tekshiruv materiallar bilan tanishish asnosida uning qonunga zid harakatlarini aniqladi. 

Qayd etilishicha, boshqarma xodimlari tomonidan amalga oshirgan tezkor tadbir davomida fuqaro A.A.ning “Redmi 6A” rusumli telefon apparati ko‘zdan kechirildi. “Instagram” ijtimoiy tarmog‘idagi uning “arslanbey9888” profili mavjud bo‘lib, unda fuqaro Rafiq Kamolovning “benomozlik, namoz mo‘min kishining hujjati, namoz o‘qimagan odamning hujjati yo‘qligi...” mavzusidagi videoma’ruzasi va juda ko‘plab diniy mazmundagi materiallarni joylashtirib tarqatgani aniqlandi. 

Tarqatilgan materiallar tekshirib ko‘rish uchun DVD+R diskka ko‘chirib olinib, O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mitaga yuborilgan.

Qo‘mitaning ekspertlik xulosasida A.A.ning “Instagram” ijtimoiy tarmog‘ida tarqatgan videomateriallar aqidaparastlik g‘oyalari bilan yo‘g‘rilgan bo‘lib, ularni O‘zbekiston Respublikasi hududiga olib kirish, tayyorlash, tarqatish taqiqlanishi ma’lum qilindi. 

Ma’lumot uchun, A.A.ga nisbatan Jinoyat kodeksining 244-1-moddasi 3-kismi “g” bandi bilan jinoyat ishi qo‘zg‘atildi.

Eslatib o‘tish mumkin, bir necha kun avval Sodiq Samarqandiy, Abu Saloh, Abdulloh Zufarlarning ma’ruzalarini tinglagan va tarqatgan farg‘onalik fuqaro qo‘lga olingan edi.

• DXX
• Diniy aqidaparastlik
• Diniy ekstremizm