31°
Kechasi 18°
Atoqli davlat va jamoat arbobi Damir Salixovich Yadgarov bugun, 4-iyul kuni uzoq davom etgan xastalikdan so‘ng 88 yoshida vafot etdi.
''Damir Yadgarov 1937-yil 18-fevralda Shofirkon tumanida tug‘ildi. O‘rta maktabni tugatib, 1960-yilda Toshkent qishloq xo‘jaligi institutini muvaffaqiyatli tamomladi.
Mehnat faoliyatini Toshkent qishloq xo‘jaligi instituti yoshlar qo‘mitasining kotibligi lavozimidan boshlab, uzoq yillar Yoshlar tashkiloti hamda qishloq va suv xo‘jaligi tizimidagi mas’ul vazifalarda ishladi.
Qayerda ishlamasin, Damir Yadgarov faoliyati davomida avvalo, o‘ziga talabchan xodim, kuyinchak rahbar sifatidagi fazilatlarini namoyon etdi.
Bu jihat uning Buxoro viloyati hokimi sifatida ishlagan 1992-1994-yillarda yanada yaqqol ko‘zga tashlandi. Aynan g‘oyatda murakkab kechgan shu yillarda Damir Yadgarov hududda ijtimoiy barqarorlikni ta’minlash, aholi turmush darajasini yaxshilash, bozor iqtisodiyotiga asoslangan yangi tartiblarni joriy etish, hududda xususiy sektorni jadal rivojlantirish borasida jonbozlik ko‘rsatdi.
Damir Salixovich Yadgarov qariyb 50 yillik mehnat faoliyati davomida o‘zining ulkan rahbarlik salohiyati, boy bilim va tajribasi, ma’naviy fazilatlari, Vatanimizga beqiyos muhabbati va sadoqati bilan haqli ravishda xalqimizning qalbidan chuqur joy olgan ulug‘ inson edi.
Shu bois viloyat ahli hamda jamoatchilik Damir Yadgarovning Buxoro va buxoroliklar uchun qilgan xizmatlarini hamisha minnatdorlik bilan xotirlaydi.
Uning bevosita rahbarligida viloyatda seleksiya va urug‘chilik sohasini ilmiy rivojlantirish borasida ulkan ishlar amalga oshirildi.
Xususan, O‘zbekiston paxtachilik ilmiy-tadqiqot instituti Buxoro filiali direktori sifatidagi mehnat faoliyati yillarida paxtaning Zarafshon vohasiga mos 10 ga yaqin iqtisodiy samarador navlari kashf etildi. Qattiqqo‘l rahbar va mehribon ustoz sifatida o‘nlab shogirdlarni tarbiyaladi.
Damir Yadgarovning hududni rivojlantirish borasidagi xizmatlari davlatimiz tomonidan munosib taqdirlanib, u “O‘zbekiston Respublikasida xizmat ko‘rsatgan qishloq xo‘jalik xodimi” unvoni, “Mehnat shuhrati” ordeni bilan mukofotlangan edi.
Ushbu musibatli kunda marhumning barcha oila a’zolari va yaqinlariga chuqur ta’ziya bildirib, Yaratgandan ularga sabr-toqat tilaymiz'' - deyiladi viloyat hokimligining rasmiy xabarida.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
