“Hududiy elektr tarmoqlari” AJ joriy yilning 17-noyabr kuni isteʼmolchilarni elektr energiyasi bilan taʼminlash boʻyicha amalga oshirilgan ishlar yuzasidan maʼlumot berdi. 

Qayd etilishicha, kecha issiqlik elektr stansiyalari va gidroelektr stansiyalari orqali 221 million 900 ming kilovatt-soat elektr energiyasi ishlab chiqarilgan. 

Shundan respublika isteʼmolchilariga elektr energiyasi importi hisobiga 229 million kilovatt-soat elektr energiyasi yetkazib berilgan.

Keltirilishicha, kuni kecha boʻlib oʻtgan kuchli shamol, qor boʻroni oqibatida havo elektr tarmoqlari hamda transformator punktlariga yetkazilgan shikast natijasida Oʻzbekistonning turli hududlarida elektr energiyasi taʼminotida vaqtincha uzilishlar kuzatilgan.

Maʼlum qilinishicha, tarmoqlarda sodir boʻladigan avariyaviy oʻchishlarni tezkor bartaraf etish maqsadida “Hududiy elektr tarmoqlari” AJ tomonidan avvaldan hududlarda jami 504 ta tezkor avariyaviy chiqish brigadalari, ularga 483 tadan ortiq maxsus avariyaviy chiqish mashinalari, maxsus texnikalar hamda rahbar xodimlardan iborat navbatchilik tashkil etilgan.

Shuningdek, Jamiyatning Telegram ijtimoiy tarmogʻidagi “Hududiy elektr tarmoqlari” AJ bilan muloqot kanali orqali elektr energiyasi taʼminotidagi muammolar yuzasidan murojaatlar yuborish imkoniyati yaratilgan.

• Elektr energiyasi
• Mehnat_vazirligi