“O‘zenergoinspeksiya” tomonidan 2022-yilning yanvar-mart oylari davomida o‘tkazilgan tadbirlarda 35 kV va undan yuqori elektr qurilmalariga ega bo‘lgan tadbirkorlik subyektlari, energo tizmi korxonalari, davlat tashkilotlarida hamda elektr tarmoqlariga noqonuniy ulanish bo‘yicha jami 221 ta holat aniqlandi.

 “O‘zenergoinspeksiya” axborot xizmati rahbari Navro‘z Norboboyevning maʼlum qilishicha, natijada 126 ta isteʼmolchilar tomonidan elektr va issiqlik energiyasidan noqonuniy foydalanganligi aniqlanib, energo taʼminot korxonalari tomonidan jami 40,3 mlrd. so‘m yetkazilgan zarar bo‘yicha qayta hisob-kitoblar qilinishi taʼminlandi.

Shuningdek, shu vaqtga qadar tekshiruvlarda noqununiy ulangan, qoniqarsiz texnik holatdagi jami 2191 ta elektr qurilmaning ishi hamda xavfsizlikka rioya qilmagan 14 ta brigadaning ishi to‘xtatildi. 148 ta masʼul xodimlarga taʼsir choralar ko‘rilishi taʼminlandi.

Bundan tashqari, hududiy elektr tarmoqlari korxonalari va huquqni muhofaza qiluvchi organlar bilan birga elektr tarmoqlariga noqonuniy ulangan isteʼmolchilarni aniqlash bo‘yicha qo‘shma nazorat tadbirlari o‘tkazildi. Unga ko‘ra 277 ta isteʼmolchilar tomonidan amaldagi qoidalarga rioya etmagan holda 12,8 mln. kVt/soat elektr energiyasidan noqonuniy foydalanilganligi aniqlandi. Buning natijasida, tizimga 5,7 mlrd. so‘mga zarar yetkazilgan.

Noqonuniy foydalanish holatlarining eng ko‘pi – Surxondaryo, Qashqadaryo, Jizzax, va Toshkent viloyatlarida aniqlandi.

Aniqlangan barcha holatlar bo‘yicha tegishli hujjatlar rasmiylashtirilib huquqni muhofaza qiluvchi organlarga taqdim etildi.

• Brifing
• Byudjet
• Elektr energiyasi