Ayni vaqtda Prezident Shavkat Mirziyoyev raisligida energiya resurslaridan samarali foydalanish hamda energetika sohasi obyektlari kuz-qish mavsumida barqaror ishlashini ta’minlash chora-tadbirlari yuzasidan videoselektor yig‘ilishi bo‘lib o‘tmoqda. Bu haqda prezident matbuot xizmati xabar berdi.

Yig‘ilishda bundan buyon ilg‘or tajriba asosida soha va tarmoqlarda energiya samaradorligini baholash bo‘yicha yangicha tizim amal qilishi belgilandi. Bunda quyidagi vazifalar belgilab berildi:
 
- yiliga kamida 4 million kilovatt elektr yoki 375 ming kub metr gaz sarflaydigan yirik iste’molchilar har uch yilda energiya auditidan o‘tadi;

- Energoinspeksiya har yili yirik iste’molchilar ro‘yxatini e’lon qilib boradi;

- auditdan o‘tmagan korxonalarga gaz va elektr oshirilgan tarifda yetkaziladi.

Bundan tashqari yig‘ilishda, mutasaddilarga yil yakunigacha yangi tizim bilan bog‘liq texnik reglament va normativ hujjatlarni ishlab chiqish topshirildi. Shuningdek, elektromobilni xonadonda quvvatlashni rag‘batlantiradigan tungi tarif joriy qilinishi ham belgilangan.

Quvvatlash uskunasiga hisoblagich o‘rnatgan aholiga tungi vaqtda quvvatlaganlik uchun arzon tarif qo‘llanadi.

Ko‘chalar, ko‘p qavatli uylar atrofida 22 kilovattgacha, xonadonda 7 kilovattgacha zaryadlash stansiyasi o‘rnatish mumkin bo‘ladi. Davlat tashkilotlari, savdo markazi, mehmonxona va dam olish maskanlari avtoturargohida quvvatlash stansiyasi o‘rnatiladi.

• Prezident
• Videoselektor