2021-yil 1-dekabrdan boshlab Oliy Majlis Qonunchilik palatasi va Senati majlislari, Qoraqalpog‘iston Respublikasi Jo‘qorg‘i Kengesi, xalq deputatlari viloyat, tuman, shahar Kengashi sessiyalari telekanallar, shuningdek, Internet tarmog‘i orqali jonli efirga uzatiladi. Mazkur tartib yopiq majlislar uchun istisno qilinadi.

Bu haqda joriy yil 16-iyunda imzolangan “Davlat organlari va tashkilotlarining faoliyati ochiqligini ta’minlash, shuningdek, jamoatchilik nazoratini samarali amalga oshirishga doir qo‘shimcha chora-tadbirlar to‘g‘risida”gi prezident farmonida belgilab qo‘yilgan.

Shuningdek, O‘zbekiston MTRK hamda Korrupsiyaga qarshi kurashish agentligiga taraflarning roziligi bilan fuqarolar huquq va erkinliklari hamda jamoat tartibiga tajovuz qiluvchi, aholi sog‘lig‘ini saqlash, ekologiya, atrof-muhitni muhofaza qilish va tabiatdan foydalanish sohasidagi, shu jumladan davlat xizmatchilarining kasbiy faoliyati bilan bog‘liq huquqbuzarliklarga oid ishlar, shuningdek, ayrim oilaviy nizolarga oid fuqarolik ishlari bo‘yicha sud majlislari (yopiq sud majlislari bundan mustasno)ni ham jonli efir orqali namoyish etish choralarini ko‘rish vazifasi yuklatilgan.

• Aksilkorrupsiya
• MTRK
• Qonunchilik palatasi
• Senat