Energetika vazirligi matbuot xizmati so‘nggi kunlarda ijtimoiy tarmoqlarda aholining elektr energiyasi ta’minotidan uzilib qolishlari bilan bog‘liq tarqalayotgan xabarlarga munosabat bildirdi.

Vazirlikka ko‘ra, “haqiqatan ham elektr ta’minotida qisqa muddatli uzilishlar hali ham uchrab turibdi va bu ko‘p hollarda, 10 daqiqadan 2 soatgacha bo‘lgan qisqa muddatli uzilishlarni tashkil qiladi”.

Shuningdek, vazirlik o‘z munosabatida yaqin o‘tmishni eslaydi va o‘sha davrlarda “ommaviy o‘chirish” holati ko‘p kuzatilganini ta’kidlaydi. 

“Aslida, bu energiya sarfini tejash uchun ma’lum bir jadvalga muvofiq amalga oshirilgan uzilishlar edi. Faqatgina 5 yil oldin tugatilgan “ommaviy o‘chirishlar”ning sababi esa oddiy. Yillar davomida elektr energiyasi iste’moli o‘sishiga qaramay, bir xil energiya balansi shakllangan va mavjud balansni teng taqsimlash maqsadida deyarli har kuni 6 yoki undan ko‘proq soatga elektr energiya ta’minotida uzilishlar ro‘y bergan. Masalan, o‘sha yillarda Qashqadaryo viloyatida ana shunday rejali o‘chirishlar kuniga 18 soatgacha yetgan. Aholining so‘zlariga ko‘ra, o‘sha vaqtlarda ertalab va kechqurun faqat 2-3 soat elektr energiyasi berilgan, xolos”, – deyiladi vazirlik munosabatida.

Ma’lum qilinishicha, 2016-yilga qadar mamlakatda elektr energiyasi iste’moli bor yo‘g‘i 20 foizga o‘sgan. So‘nggi 5 yil ichida esa bu ko‘rsatkich yillik 11 foizni tashkil qiladi.

“Biz kunlik uzoq muddatli o‘chirishlarga barham berdik, ma’lum sabablarga ko‘ra yuzaga kelayotgan qisqa muddatli elektr ta’minotidagi uzilishlar esa tunu-kun ishlaydigan avariyaga qarshi maxsus brigadalar tomonidan zudlik bilan bartaraf etib borilmoqda.
Bu kabi uzilishlarning bir necha yil avval Samarqand, Buxoro, Urganch va respublikamizning boshqa hududlarida deyarli har kuni 4-6 soat davomida elektr ta’minotisiz qolgan o‘tmishi bilan aloqasi yo‘q”, – deyiladi munosabatda.

Vazirlik ma’lumotiga ko‘ra, 1991–2016-yillarda yoki 25 yil ichida respublika bo‘yicha 9 300 km elektr uzatish tarmoqlari va 4 800 ta transformatorlar yangilangan. 

2017–2021-yillar davomida (oxirgi besh yilda) esa 40 600 km bo‘lgan elektr uzatish tarmoqlari va 12 900 ta transformatorlar yangilanmoqda. 4 600 MVtdan ziyod yangi quvvatlar ishga tushirilmoqda.

• Elektr energiyasi
• Vazirlik