Kecha, 15-yanvar kuni Energetika vazirligi muhim murojaat bilan chiqdi.

Uning asosiy mazmuni sovuq kunlarda gaz va elektr energiyaga bo‘lgan talabning oshishi, ularni yetkazib berishda yuzaga kelayotgan muammolardir. Murojaat vazirlik matbuot xizmati bosh mutaxassisi Obidjon Dilmurodov ishtirokidagi brifingda o‘qib eshittirilgan.

Qayd etilishicha, anomal sovuq tufayli 12-yanvarda qo‘shni mamlakatning tabiiy gaz qazib chiqarish konlarida yuzaga kelgan avariyaviy holat tabiiy gaz importining to‘liq to‘xtashiga va boz ustiga elektr energiyasi importining 20 foizga qisqarishiga sabab bo‘lgan.

Shuningdek, tabiiy gaz va elektr energiyasi importi hajmini tezkor ko‘rilgan choralar va kelishuvlar asosida maksimum darajaga oshirish hisobiga kunlik tabiiy gaz iste’molining 10 foizi hamda elektr energiyasining 8 foizi aynan qo‘shimcha import yordamida ta’minlanib kelmoqda.

Biroq gaz quvurlari va magistral elektr tarmoqlarining o‘tkazuvchanlik qobiliyati yaxshi bo‘lsa-da, resurslar yetarli emasligi hisobiga iste’molchilarni energiya resurslari bilan ta’minlashda muammolar kuzatilmoqda.

Bugungi kunda respublikaning elektr energiyasi iste’moli eng baland ko‘rsatkichga, ya’ni 250 mln kVt.soatga yetgan. Shuningdek, tabiiy gazga bo‘lgan kunlik talab qazib chiqarishga nisbatan yuqoriligicha saqlanib qolmoqda.

Iste’molchilarning xonadonlarini isitish uchun elektr qurilmalaridan keng foydalanishlari natijasida birgina Toshkent shahrida bugun kun davomida tarmoqlarda yuklamalarning ortishi hisobiga 1000 dan ortiq nosozlik yuzaga keldi.

Nosozliklarni bartaraf etish ishlarni jadallashtirish maqsadida respublika bo‘ylab barcha hududiy elektr tarmoqlari korxonalaridan qo‘shimcha brigadalar Toshkentga jalb qilingan.

Bundan tashqari 2022 yil 31 dekabr kuni cheklov kiritilmagan va kunlik elektr energiyasi iste’moli 220 million kilovatt soatni tashkil etgani va shu kunlarda bu ko‘rsatkich yanada oshib ketgani ta’kidlandi.

Tabiiy gaz va elektr energiyaga bo‘lgan ehtiyojning ortishi qurilmalarda nosozliklarni yuzaga keltirmoqda. Birgina Toshkent shahrida 13 yanvar kuni elektr energiyasi iste’moli 32 million kilovatt soatdan ortib, turli sabablarga (avariyaviy holatlar va cheklovlar) ko‘ra 1 million kilovatt soat elektr energiyasi iste’molchilarga yetkazib berilmagan. Tabiiy gazni aholiga yo‘naltirish uchun issiqlik elektr stansiyalarida tabiiy gaz yoqish hajmi kamaytirilib, zaxiradagi mazut yoqilg‘isi rejaga nisbatan 3 barobarga ko‘p yoqilayotgani ma’lum qilingan.

Shuningdek, korxonalar va tashkilotlar xodimlarini vaqtincha onlayn ish rejimiga o‘tkazish, elektr energiyasi sarfini keskin kamaytirish so‘ralgan.

“Nosozliklarni bartaraf etish ishlarni jadallashtirish maqsadida respublika bo‘ylab barcha hududiy elektr tarmoqlari korxonalaridan qo‘shimcha brigadalar Toshkentga jalb qilindi. Albatta, biz ushbu vaziyatni o‘nglash, nosozliklarni bartaraf etish uchun barcha zaruriy choralarni ko‘rmoqdamiz. Mana shunday og‘ir paytda barchamiz birlashib harakat qilsak bu muammolarni yengamiz. Bunda energiya resurslaridan oqilona va imkon qadar tejamkorlik bilan foydalanish eng muhim omil hisoblanadi. Buning uchun imkon qadar xonadonlarda bittadan ortiq elektrda ishlaydigan isitish qurilmalaridan foydalanmaslik, korxonalar va tashkilotlar xodimlarini vaqtincha onlayn ish rejimiga o‘tkazish, ortiqcha ko‘cha chiroqlarini, reklama ekranlari va illyuminasiyalar, shu jumladan, qurilishi tugallanmagan binolardagi chiroqlarni o‘chirish lozim”, –deyiladi murojaatda.

• Energetika_vazirligi
• Murojaat