AQSh rahbari Donald Tramp butun G‘azoni buzib tashlash va falastinliklarni u yerdan ko‘chirish rejasi haqida gapirgan edi. Turkiya prezidenti Rajab Toyyib Erdo‘g‘an ushbu rejani tanqid qildi.

Istanbuldagi Otaturk aeroportida bo‘lib o‘tgan matbuot anjumanida Erdo‘g‘an G‘azo aholisini o‘z vatanidan chiqarib yuborishga hech kimning haqqi yo‘qligini ta’kidlagan.

“Isroil administratsiyasi doimiy tinchlikni saqlash o‘rniga yanada hiylakor va shafqatsizroq rejalar tuzmoqda... AQSh ma’muriyatining sionist lobbilar ta’siri ostida G‘azo masalasida kun tartibiga qo‘ygan takliflari, bizningcha, e’tibor va muhokamaga loyiq emas. Ular mutlaqo bema’ni...

Hech kim G‘azo aholisini ularning ming yillik abadiy va o‘zgarmas vatanidan quvib chiqarishga qodir emas. G‘azo, Iordaniya daryosining g‘arbiy qirg‘og‘i va Sharqiy Quddusni o‘z ichiga olgan Falastin faqat falastinliklarga tegishli”, – degan Turkiya prezidenti.

Erdo‘g‘an G‘azo sektorini o‘z xalqidan ajratishga qaratilgan har qanday urinishlar, qanday bo‘lishidan qat’i nazar, muvaffaqiyatsizlikka uchrashini bildirgan. Erdo‘g‘an maqsad mintaqada tinchlik, barqarorlik va taraqqiyotga erishish bo‘lsa, vaziyatni keskinlashtirmasdan falastinliklar huquqini tan olish kerakligini ta’kidlagan.

• Erdogʻan
• Falastin
• Tramp