Samarqand viloyati hokimi Erkinjon Turdimov Shanxay hamkorlik tashkiloti sammitiga mezbonlik munosabati bilan murojaat yo‘lladi. Bu haqda viloyat hokimligi axborot xizmati ma’lum qildi.

Unda Samarqand shahrida qilingan ishlar va o‘zgarishlar haqidagi ma’lumotlar ham qayd etilgan.

Ta’kidlanishicha, mazkur sammitga tayyorgarlik kecha yoki bugun emas, Prezident Shavkat Mirziyoyev tomonidan SHHTning 2022 yildagi sammitini Samarqandda o‘tkazish tashabbusi ilgari surilganida boshlangan. Buning uchun Samarqand shahrining infratuzilmasi to‘liq yangilangan, yo‘l va ko‘priklar, xiyobonlar qurilib, Rudakiy, Ibn Sino, Bo‘stonsaroy, Afrosiyob, Shohi Zinda, Sadriddin Ayniy, Registon, Panjikent, Firdavsiy, Dahbed kabi o‘ndan ortiq ko‘chalar rekonstruksiya qilindi. Usta Umar Jo‘raqulov ko‘chasi tubdan qayta qurildi. Bu ko‘chalar atrofidagi turar joy va boshqa ob’yektlar ham milliy va zamonaviy arxitektura uyg‘unligida yangidan bunyod etilgan. Shuningdek, Samarqand xalqaro aeroportining o‘ziga xos ko‘rinishdagi zamonaviy yangi terminali ishga tushirilgan.

“Prezidentimiz g‘oyasi va tashabbusi bilan 250 gektardan ortiq ochiq maydonda, eshkak eshish kanali atrofida keyingi yillar davomida qurilgan “Buyuk ipak yo‘li” xalqaro turizm markazi xalqimiz bunyodkorlik salohiyatining yorqin ifodasi bo‘ldi. Nafaqat yurtimiz, balki Markaziy Osiyoda tengi yo‘q, deb e’tirof etilgan bu majmuada jahon standartlariga mos mehmonxonalar va kongress markazi, xalqimiz tarixi, madaniyati, an’ana va qadriyatlarini namoyon etuvchi “Boqiy shahar” majmuasi va yana ko‘plab boshqa inshootlar bugun Samarqandning ko‘rkiga aylandi. Ayni paytda esa buyuk muhaddis bobomiz Imom Buxoriy nomi bilan bog‘liq me’moriy majmua ulug‘ zotning Islom olamida tutgan mavqei va salohiyatiga mos tarzda qaytadan bunyod etilmoqda”, – deyiladi bayonotda.

Murojaatning to‘liq matni bilan bu yerda tanishish mumkin.

• Erkinjon Turdimov
• Hokimlik
• Samarqand
• ShHT