Eron Islom Respublikasining sobiq prezidenti Ibrohim Raisiy vafotidan so‘ng navbatdan tashqari saylovlar boshlanib, prezidentlikka nomzodlar uchun kvalifikatsiya qilinayotgan edi. Saylov shtabi matbuot kotibi Muhsin Islomiyning ma’lum qilishicha nomzodlar tasdiqlangan.

Xabar berilishicha, 20 ga yaqin nomzoddan olti nafari tasdiqlangan. Bular:

- Ichki ishlar vazirligi va Adliya vazirligining sobiq rahbari Mustafo Purmuhammadiy (2013-yilgi saylovlarda nomzodini qaytarib olgan);

- Eron oliy rahbarining Milliy xavfsizlik oliy kengashidagi vakili Said Jaliliy;

- Amaldagi parlament spikeri Muhammad Bag‘er G‘olibaf (uch marta saylovda qatnashgan – 2005-yilda to‘rtinchi o‘rinni egallagan, 2013-yilda – ikkinchi, 2017-yilda u o‘z nomzodini qaytarib olgan);

- Tehron meri Alirizo Zakaniy (2013 va 2017-yillarda saralashdan o‘ta olmagan, 2021-yilda Raisiy foydasiga o‘z nomzodini qaytarib olgan);

- Eronning sobiq sog‘liqni saqlash va tibbiy ta’lim vaziri va parlament a’zosi Masud Pezeshkiyan;

- Shahidlar va faxriylar ishlari bo‘yicha jamg‘arma rahbari, Eron parlamenti raisining sobiq birinchi o‘rinbosari Amir Husayn G‘ozizoda Hoshimiy.

Islomiyning qo‘shimcha qilishicha, nomzodlar e’lon qilinganidan keyin saylovoldi tashviqot ishlari boshlanadi va 27-iyunda yakunlanadi.

Eslatib o‘tamiz, Eron prezidentligiga nomzod sifatida ro‘yxatdan o‘tgan birinchi ayol, Eron parlamentining sobiq a’zosi Zohre Elaxian o‘z nomzodini qaytarib olganini ma’lum qildi. Shuningdek, Eronning sobiq prezidenti Mahmud Ahmadinajodga uchinchi bor saylovda qatnashish huquqi berilmadi. Bu inson mamlakatni 2005-2013-yillarda boshqargan.

• Eron
• Prezident
• saylov