Eron hukumati mamlakat xavfsizlik xizmatlari poytaxt Tehronda ISHID jangarilari tomonidan tayyorlanayotgan keng ko‘lamli teraktning oldini olganini ma’lum qildi. Bu haqda mahalliy nashrlar xabar berdi.

OAVning razvedka rasmiylariga tayanib xabar berishicha, Tehronda “gavjum joylarda bir vaqtda portlashi kerak bo‘lgan” 30 ta bomba zararsizlantirilgan.

Shuningdek, mamlakatda ISHIDga aloqador 28 nafar terrorchi qo‘lga olingani xabar qilingan.

Axborot agentligining qayd etishicha, fitna ishtirokchilaridan ba’zilari ISHID a’zolari, boshqalari esa avvalroq Suriya, Afg‘oniston, Pokiston va Iroq Kurdistonidagi jangari guruhlar bilan aloqador bo‘lgan.

“Operatsiyalar davomida terrorchilardan qurol-yarog‘ va jihozlar, jumladan, juda ko‘p miqdorda portlovchi moddalar, bombalar, portlovchi qurilmalar uchun materiallar, portlovchi moslamalar uchun 100 dona kapsuladan iborat paket, to‘pponcha va o‘qlar, turli intellektual va sun’iy yo‘ldosh telekommunikatsiya qurilmalari, harbiy texnikalar, xudkush kamarlar, Iroq Kurdistonida qo‘llanadigan modemlar, shuningdek, xorijiy valyutalar musodara qilindi”, – dedi maxsus xizmatlar vakillari jurnalistlarga.

Shu bilan birga, razvedka idoralari bu safargi aksilterror operatsiyasini rejalashtirish ISHID terrorchilarining boshqa operatsiyalariga nisbatan “juda murakkab” bo‘lganini aytishdi. 

Operatsiyada Eron razvedka xizmatining ikki nafar xodimi yaralanganligi aytilmoqda.

• Eron
• Tehron
• bomba
• razvedka