AQShning saylangan prezidenti Donald Tramp o‘zining inauguratsiyasi arafasida Vashingtondagi Capital One Arena majmuasida o‘z tarafdorlarining mitingida nutq so‘zlab, davlat rahbari bo‘lgan birinchi kundayoq ko‘plab farmonlarni imzolashga va’da berdi.

“Biz g‘alaba qozondik!” – dedi Tramp nutq boshida olomonning qichqirig‘iga.

Uning so‘zlariga ko‘ra, yangi ma’muriyat “Vashingtondagi muvaffaqiyatsiz muassasa hukmronligini tugatish” va “Amerikani yana buyuk qilish” niyatida.

“Ertaga tushda Amerikaning to‘rt yillik tanazzulining pardasi yopiladi va biz Amerika kuchi va farovonligi, qadr-qimmati va g‘ururi uchun mutlaqo yangi bobni boshlaymiz”, – deydi saylangan prezident Tramp.

Shuningdek, u bugun inauguratsiya nutqida aniq choralarni e’lon qilishni va’da qilib, Amerika chegarasidagi noqonuniy muhojirlarning “bosqini”ni to‘xtatishga alohida e’tibor qaratishini ta’kidlagan.

“Mutaxassislarning ta’kidlashicha, uning millionlab noqonuniy muhojirlarni deportatsiya qilish haqidagi va’dasi katta logistika qiyinchiliklariga duch keladi va o‘nlab yoki yuzlab milliard dollarga tushishi mumkin”, – deb yozadi BBC muxbirlari.

Tramp bugun 200 dan ortiq hujjatlarni, shu jumladan ijroiya farmonlari va boshqa prezident buyruqlarini imzolashi kutilmoqda.

Shuningdek, Tramp o‘z nutqida G‘azodagi sulh shartnomasi va TikTok ijtimoiy tarmog‘idagi vaziyatga ham to‘xtalib o‘tgan. Bundan tashqari, Ukrainadagi urushni tugatishni va’da qilgan.

• AQSh
• Tramp