Qurilish me’yoriy talablari qo‘pol ravishda buzilgan obyektda qurilish-montaj ishlari to‘xtatilgan.

Farg‘ona viloyati Qurilish sohasida hududiy nazorat inspeksiyasi Farg‘ona shahar Registon ko‘chasida joylashgan turar-joy binosi bo‘yicha ijtimoiy tarmoqlar orqali tarqalgan holat yuzasidan quyidagilarni ma’lum qiladi:

Buyurtmachi H.Latipov tomonidan qurilayotgan Farg‘ona shahar Registon ko‘chasidagi bo‘sh yer maydonida to‘rt qavatli turar-joy binosi, avtoturargoh, bolalar maydonchasi qurish hamda tutash hududni obodonlashtirish va ko‘kalamzorlashtirish obyekti inspeksiyadan 2018-yil 3-dekabr kuni ro‘yxatdan o‘tgan va qurilish ishlari boshlangan, obektda inspeksiya tomonidan doimiy nazorat ishlari olib borilgan.

Turar-joy binosining loyiha hujjatlarida to‘rt qavat qurish belgilangan, amalda esa yetti qavat qilib qurilgan. Ushbu obyektning beshinchi, oltinchi, yettinchi qavatlarini qurish uchun pastki qavatlarning yuk ko‘tarish qobiliyatini o‘rganish bo‘yicha “Inspection work” MCHJ (bino inshootlarni texnik xolatini tekshirish bo‘yicha lisenziya raqami AL-002105) tomonidan tayyorlangan texnik xulosaga asosan yuqori qavatlarni yengil qurilish materiallaridan bajarishga tavsiya etilgan.

Lekin buyurtmachi H.Latipov va pudratchi “Ikat Vodiy” MCHJ tomonidan ushbu xulosaga asosan loyiha hujjatlari qayta to‘liq ishlab chiqilmagan, belgilangan tartibda ekspertizadan o‘tkazilmagan hamda inspeksiyaga xabarnoma yuborib ro‘yxatdan o‘tmasdan qurilish ishlari amalga oshirilgan.

Ushbu holat yuzasidan Farg‘ona viloyat qurilish sohasida hududiy nazorat inspeksiyasi tomonidan ob’yekt qurilishini to‘xtatish to‘g‘risida 2022-yil 12-dekabrda yozma ko‘rsatma berilgan. Shuningdek, aniqlangan qonun buzilish holati yuzasidan 2022-yil 26-dekabr kuni ma’muriy huquqbuzarlik to‘g‘risida MJtK 99-modda 7-qismi bilan bayonnoma rasmiylashtirilib, ma’muriy sudga yuborilgan. Bugungi kunda obektda qurilish-montaj ishlari to‘xtatilgan.

• Farg‘ona
• Uy-joy