Yil oxiriga qadar Farg‘onada elektromobil ishlab chiqarish yo‘lga qo‘yiladi. Bu haqda viloyat hokimligi axborot xizmati xabar berdi.

Qayd etilishicha, ishlab chiqarish Farg‘onadagi “Central Asia Motors” korxonasi negizida yo‘lga qo‘yiladi.

Viloyat hokimi Xayrullo Bozorov elektromobillar uchun ehtiyot qismlarni ishlab chiqarishni o‘zlashtirish hamda yengil va yuk elektromobillarini ishlab chiqarish loyihasi bo‘yicha qilingan ishlarni ko‘zdan kechirgan.

Korxonada, shuningdek, elektromobillar uchun kuzov, quvvatlash stansiyasi, akkumulyator ehtiyot qismlari ishlab chiqarilishi mahalliylashtiriladi.

Ta’kidlanishicha, loyihaning umumiy qiymati 50 million dollarga baholanmoqda. Shundan 40 million dollarni to‘g‘ridan-to‘g‘ri xorijiy investisiyalar tashkil etadi.

Yiliga 10 ming dona avtomobil ishlab chiqarish, uning 40 foizini eksportga yo‘naltirish rejalashtirilgan.

• Elektromobil
• Farg‘ona