“Cobalt”ga ortilgan 57,6 million soʻmlik pirotexnikalar fosh etildi. Bu haqda Bojxona qoʻmitasi xabar berdi.

Qayd etilishicha, Fargʻona viloyati bojxona boshqarmasi Kontrabandaga qarshi kurashish va bojxona auditi boʻlimi xodimlari tomonidan oʻtkazilgan tezkor tadbir davomida, “Vodil-Fargʻona” yoʻnalishida harakatlanayotgan fuqaro K.A. boshqaruvidagi “Kobalt” rusumli avtomashina kuzatuvga olinib, Fargʻona shahri hududida toʻxtatilib koʻzdan kechirilgan.

Natijada, mazkur avtomashina saloni va yukxonasida fuqaro X.D.ga tegishli boʻlgan, xorijda ishlab chiqarilgan va bojxona rasmiylashtiruvidan oʻtganligini tasdiqlovchi hujjatlari boʻlmagan, umumiy qiymati 57,6 million soʻmlik 230,4 ming dona “Britanik” nomli pirotexnika vositalari borligi aniqlangan.

Maʼlum qilinishicha, hozirda mazkur holat yuzasidan bojxona organlari tomonidan surishtiruv harakatlari olib borilmoqda.

• Bojxona
• Farg‘ona
• Pirotexnika