Oltiariq tumanida fuqaro xonadonida boʻlgan 1 bosh sigir quturish kasalligiga chalingan. Natijada hudud tuman veterinariya va chorvachilikni rivojlantirish boʻlimi tomonidan alohida nazoratga olingan, aholi qaramogʻidagi chorva hayvonlari klinik koʻrikdan oʻtkazilgan. Bu haqda Veterinariya va chorvachilikni rivojlantirish davlat qoʻmitasi xabar bermoqda.

Maʼlum qilinishicha, Oltiariq tumani “Azimobod” MFYda yashovchi fuqaro X. A Azimobod veterinariya uchastkasi mudiri T.Qirgʻizboyevga telefon orqali murojaat qilib, 13 kun avval bozordan 1 bosh sigir sotib olinganligini bildirib, uning ishtahasi yoʻqligi, noxush holatdaligi haqida xabar bergan. Uchastka mudiri kasallangan hayvonni veterinariya koʻrigidan oʻtkazganda quturish kasalligiga xos klinik belgilar qayd etilgan.

Ushbu qoramoldan olingan namunalar Viloyat hayvon kasalliklari tashxisi va oziq-ovqat mahsulotlari xavfsizligi davlat markazi virusologiya boʻlimida tekshirilganda quturish kasalligi tasdiqlanib, yakuniy tekshirish xulosasi olish uchun 1 oy bioprobaga qoʻyilgan.

Shuningdek, Oltiariq tumani veterinariya va chorvachilikni rivojlantirish boʻlimiga quturish kasalligiga qarshi kompleks veterinariya-sanitariya tadbirlari oʻtkazish boʻyicha koʻrsatma berilgan.

Taʼkidlanishicha, kasallik kelib chiqishiga Azimobod MFY choʻl hududidagi yovvoyi fauna mavjudligi, yaʼni yovvoyi hayvonlar yoki kemiruvchilar borligi sabab boʻlgan.

Ushbu hudud tuman veterinariya va chorvachilikni rivojlantirish boʻlimi tomonidan alohida nazoratga olinib, hozirda aholi qaramogʻidagi chorva hayvonlari klinik koʻrikdan oʻtkazilib, profilaktik veterinariya-sanitariya tadbirlari oʻtkazilmoqda.

Keltirilishicha, mazkur hududda quturish kasalligiga qarshi 53 bosh it Biokan-R vaksinasi bilan emlangan, 12 bosh daydi qarovsiz itlar Obodonlashtirish boshqarmasi tomonidan ovlangan.

Xonadon egasi X. A va turmush oʻrtogʻi X. N kasal hayvon bilan kontaktda boʻlganligi uchun tuman Sanitariya epidemiologiya osoyishtaligi va jamoat salomatligi markazi tomonidan meditsina muolajasi olib, ularning umumiy holati yaxshiligi maʼlum boʻlgan.

• Veterinariya