Bugun, 10-avgust kuni Fargʻona neftni qayta ishlash zavodida oʻzini-oʻzi yoqib yuborgan Sanobarxon Xaydarova vafot etdi.

Sanobarxon Xaydarova joriy yilning 2 avgust kuni ertalab soat 08:30 larda zavodning 1-sektoriga kirish yoʻlagida ustidan benzin quyib, oʻzini yoqib yuborgan edi. Oqibatda u kuyish tan jarohatini olgan va zavod tibbiyot xodimlari tomonidan birinchi yordam koʻrsatilib, soʻngra korxona tez yordam avtomashinasida Respublika shoshilinch tibbiy yordam ilmiy markazi Fargʻona filialiga yotqizilgandi.

Maʼlumotlarga koʻra, marhum sakkiz kun davomida shifokorlarning doimiy nazorati ostida boʻlgan. Biroq, 10-avgust kuni soat taxminan 07:00 larda ayolning umumiy ahvoli keskin yomonlashgan, qon bosimi va yurak urishi yoʻqolgan. Ertalab soat 7:05 da biologik oʻlim qayd etilgan.

Qayd etish kerakki, Sanobarxon Xaydarova oʻz joniga qasd qilishiga, uning ish joyi oʻzgartirilgani sabab boʻlgani aytilmoqda. Shu bilan birga zavod uning lavozimi oʻz arizasiga koʻra, oʻzgartirilganini maʼlum qildi.

Bosh prokuratura bergan maʼlumotga koʻra, holat yuzasidan Fargʻona shahar prokuraturasi tomonidan tergovga qadar tekshiruv olib borilmoqda.

• Farg‘ona