Bolalarni nazoratsiz qoldirish yomon oqibatlarga va hatto ko‘ngilsiz holatlarga olib kelishi mumkin. Endigina 2 yoshni qarshilayotgan farg‘onalik Samira Toirjonavada xuddi shunday holat kuzatilgan.

Ma’lum bo‘lishicha, qizaloq magnit sharchalar bilan o‘ynab kelgan va shu jarayonda ulardan ancha-munchasini ichiga yutgan. Vaqt o‘tishi bilan sharchalar qornida yig‘ilib qolgan va uning hayotiga jiddiy xavf solgan.

Ota-onasi zudlik bilan Respublika shoshilinch tibbiy yordam ilmiy markazi Farg‘ona viloyati filialiga murojaat qiladi. Tekshiruvlar o‘tkazilganida qorinning ikki yonida magnitlar yig‘ilib qolgani aniqlangan.

Shifokorlar konservativ usulda davolashga kirishib, qayd qildirish orqali sharchalardan 14 donasini chiqarib oladi, ammo aksariyati ichkarida qolgan.

Bemorning ota-onasi bolani Toshkentga, Respublika shoshilinch tibbiy yordam ilmiy markaziga olib kelgan. Markazda jarrohlik amaliyoti davomida qizaloq qornidan 135 ta magnit sharcha olingan.

To‘rt yarim soat davom etgan ushbu murakkab operatsiyani tibbiyot fanlari doktori, professor Habibulla Oqilov hamda markazning Nozim O‘rmonov, Dilmurod Sabirov kabi tajribali mutaxassislari amalga oshirgan.

Ayni paytda bemorning ahvoli yaxshi va u doimiy shifokorlar nazoratida.

• Bola
• Farg‘ona
• Shifokor
• shifoxona