Rossiya Federatsiyasi prezidenti matbuot kotibi Dmitriy Peskov Finlyandiyaning NATOga aʼzo bo‘lishi hamda Rossiya va NATO munosabatlari yuzasidan bayonot berdi.

U jurnalistlar bilan bo‘lgan uchrashuvda Finlandiyaning NATOga kirishini “xavfsizlikka tahdid” deb atagan.  

– Albatta, NATOning navbatdagi kengayishi bizning qitʼamizni yana-da barqaror va xavfsizroq qilmaydi, – dedi u jurnalistlarga tegishli savolga javob berib.

Unga, shuningdek, Ukrainadagi qurolli harakatlarga munosabat sifatida Kreml boshqa qo‘shni davlatlarning NATOga qo‘shilish xavfini ham hisoblab chiqdimi, degan savol berilgan.

– Barcha variantlar har doim ko‘rib chiqiladi va tahlil qilinadi, – deb javob berdi Peskov.

Shuningdek, u Finlandiya NATOga aʼzo bo‘lganidan keyin Rossiya o‘z xavfsizligini taʼminlash bo‘yicha zarur choralarni ishlab chiqish maqsadida maxsus tahlil o‘tkazishini aytgan.

– Esingizda bo‘lsa, NATOning sharqiy qanoti mustahkamlanishi munosabati bilan g‘arbiy qanotlarimizni mustahkamlash yuzasidan chora-tadbirlar ro‘yxatini ishlab chiqish bo‘yicha Prezident va Oliy Bosh qo‘mondonning ko‘rsatmasi bor. NATO bizning yo‘nalishda harakat qilmoqda. Shuning uchun, albatta, bularning barchasi vaziyatni muvozanatga keltirish va xavfsizligimizni taʼminlash bo‘yicha maxsus tahlil qilish hamda zarur choralarni ishlab chiqish uchun yetarli asos bo‘ladi. – dedi Peskov jurnalistlarga Finlyandiyaning NATOga kirishiga Rossiyaning javobi qanday bo‘lishi mumkinligi haqidagi savolga javoban.

U, shuningdek, barchasi kelajakda ushbu harbiy alyansning kengayish jarayoni va harbiy infratuzilmaning qanchalik Rossiya chegaralariga yaqinlashishiga bog‘liqligini taʼkidlagan.

Eslatib o‘tamiz, avvalroq, Finlandiya prezidenti Sauli Niinistyo va bosh vazir Sanna Marin mamlakatni NATOga zudlik bilan aʼzo bo‘lishga chaqirgan edi.

Shuningdek, ular yaqin kunlarda alyansga qo‘shilish bo‘yicha milliy darajada qadamlar qo‘yilishiga umid bildirdilar.

• NATO
• Peskov
• Rossiya
• Urush