Finlyandiya bosh vaziri Petteri Orpo mamlakat yaqin kelajakda Rossiya bilan chegarada nazorat punktlarini ocholmasligini aytgan. Bu haqda “Коммерсант” xabar berdi.

Qayd etilishicha, avvalroq Finlyandiya rasmiylari nazorat-o‘tkazish punktlari 11-fevralgacha yopilishini ma’lum qilgan edi.

“Biz tushunganimizdek, sharqiy chegara ortida Finlyandiyaga noqonuniy ravishda kelishni maqsad qilgan odamlar bor... Chegaralarning yopilishini bekor qila olmasligimiz aniq”, – dedi Petteri Orpo “Yle TV” telekanalida.

Uning qo‘shimcha qilishicha, minglab odamlar Rossiyadan Finlyandiyaga kirishni xohlashadi. Bosh vazirning so‘zlariga ko‘ra, rasmiylar chegara ochilgunga qadar noqonuniy migratsiyaga chek qo‘yish choralarini ishlab chiqishi kerak.

Finlyandiya hukumati 2023-yil noyabr oyi o‘rtalarida Rossiya bilan chegaradagi nazorat-o‘tkazish punktlari faoliyatini cheklashni boshlab, yil oxirigacha ularning barchasini yopib qo‘ygan. 11-yanvar kuni esa nazorat-o‘tkazish punktining yopilishi 11-fevralgacha uzaytirilgan. Finlyandiya hukumati bunday choralarni Rossiya hududidan kelayotgan noqonuniy muhojirlarning ko‘pligi bilan izohladi.

• Chegara
• Finlandiya
• Rossiya