Florida shtati gubernatori Ron Desantis 2024-yilgi saylovlarda AQSh prezidentligi uchun o‘z nomzodini qo‘yish niyatida ekanligini ma’lum qildi.

“Men, Ron Desantisman va Amerikaning buyuk qaytishiga rahbarlik qilish uchun prezidentlikka nomzodimni qo‘ymoqdaman”, – deydi siyosatchi o‘z video murojaatida.

44 yoshli Desantis 24-may kuni AQShda kelasi yilning noyabrida bo‘ladigan saylovlarda ishtirok etish uchun hujjatlarni topshirdi. Siyosatchi o‘z partiyasidan prezidentlikka nomzodini ilgari surish uchun Amerikaning sobiq yetakchisi Donald Tramp bilan raqobatlashadi. Ko‘pchilikning fikricha, aynan Desantis respublikachilar orasida sobiq prezidentning asosiy raqibi hisoblanadi.

AQShda prezidentlik saylovi 2024-yilning noyabr oyiga belgilangan. Tramp 2022-yil noyabrda prezidentlik uchun kurashga kirishishini e’lon qildi. Amaldagi davlat rahbari Jo Bayden ham aprel oyida “boshlagan ishini yakunlash” uchun ikkinchi muddatga o‘z nomzodini ko‘rsatishini rasman e’lon qildi va saylov kampaniyasi veb-sayti ishga tushirildi. Agar Bayden muvaffaqiyatga erishsa, ikkinchi prezidentlik muddati boshida 82 yoshga to‘ladi va Amerika tarixidagi eng keksa prezident sifatida o‘zi o‘rnatgan rekordni yangilaydi.

• AQSh
• Prezident
• Tramp
• saylov