Fransiya taraqqiyot agentligi O‘zbekistonda chorvachilikni rivojlantirish uchun 100 mln yevro ajratadi. Bu haqda joriy yil 13-yanvar kuni imzolangan Prezident qarorida gap boradi.

Qaror matnida aytilishicha, 2021-yil 28-iyunda O‘zbekiston va Fransiya taraqqiyot agentligi (FTA) o‘rtasida imzolangan bitimda “Chorvachilik sohasini barqaror rivojlantirishni moliyalashtirish” loyihasini moliyalashtirish uchun 100 mln yevro miqdorida qarz ajratish nazarda tutilgan. Loyihani amalga oshirish muddati – 5 yil (2022-2026-yillar).

Loyihaning umumiy qiymati 147,07 mln yevro ekvivalentida bo‘lib, shundan:

– 100 mln yevro – FTAning qarzi;

– 29,96 mln yevro – Loyiha ishtirokchilari (benefisiarlar)ning ulushi;

– 17,1 mln yevro (shu jumladan soliq va bojxona to‘lovlari shaklida mablag‘lar) – O‘zbekiston Respublikasining ulushi.

Belgilanishicha:

– Loyihani amalga oshirish doirasida FTA qarzi hisobidan xarid qilinadigan tovarlarni (ish, xizmatlarni) va maxsus transport vositalarini olib kirishda (sotib olishda) QQS tovarlarni (ish, xizmatlarni) olib kiruvchilar (import qiluvchilar, xizmatlarni sotib oluvchilar) tomonidan to‘lanadi;

– ushbu bojxona boji imtiyozlari natijasida bo‘shagan mablag‘lar hamda tovarlarni olib keluvchilar tomonidan to‘langan qo‘shilgan qiymat solig‘i summasi O‘zbekiston Respublikasining Loyihani amalga oshirishdagi ulushi deb hisoblanadi.

Loyiha dastlab Qoraqalpog‘istonda, Toshkent, Jizzax, Sirdaryo, Qashqadaryo, Samarqand va Buxoro viloyatlarida amalga oshiriladi. Loyiha doirasida nazarda tutilgan chora-tadbirlar 50 foizdan ziyod moliyalashtirilgandan so‘ng respublikaning barcha viloyatlarida amalga oshiriladi.

Loyihani amalga oshirish davrida monitoring va hisobot yuritilishi uchun mas’ul ijro etuvchi organ Veterinariya va chorvachilikni rivojlantirish davlat qo‘mitasi hisoblanadi.

• Chorvachilik
• Fransiya
• Kredit