Fransiyaning Sena-Port kommunasi fuqarolari referendumda jamoat joylarida smartfonlardan foydalanishni taqiqlash ma’qullandi. Bu haqda “The Guardian” nashri xabar bermoqda. Unga ko‘ra, kattalarga jamoat joylarida, qirg‘oq, do‘kon, kafelarda, bolalarini maktabdan olishga borganda, bolalarga esa ko‘chada ketayotganda telefondan foydalanish taqiqlanadi. Manzildan adashib telefon xaritasidan foydalanmoqchi bo‘lganlarga esa odamlardan yo‘lni so‘rash tavsiya etiladi.

Farzandiga 15 yoshgacha smartfon bermaslik to‘g‘risida shartnoma imzolagan ota-onalar shahar hokimligidan qo‘ng‘iroq funksiyasiga ega oddiy telefon olishlari mumkin.

Smartfonlarni taqiqlash tashabbusi saylovchilar ro‘yxatining 20 foizini tashkil qiluvchi Sena-Portning 277 nafar aholisi tomonidan qo‘llab-quvvatlandi. Hududda 2 mingga yaqin aholi istiqomat qiladi. Ma’muriyat Fransiyaning smartfonlardan foydalanishni tartibga soluvchi birinchi munitsipal qarorini tayyorlamoqda. Biroq, qonunbuzarlarni jarimaga tortish hali mumkin emas, chunki hozircha bunga oid biror qonun yo‘q. Buning o‘rniga hamma jamoat joylariga telefondan foydalanmaslik to‘g‘risida ko‘rsatmali plakatlar osiladi. Do‘kon sotuvchilari esa odamlardan muloyimlik bilan telefondan foydalanmaslikni so‘raydi.

• Fransiya
• Qaror
• Telefon