Venesuela poytaxti Karakasdagi universitet talabalari Isroilning G‘azo sektoridagi tajovuziga qarshi namoyish o‘tkazdi. Bu haqda “Anadulu” xabar berdi.

Qayd etilishicha, yuzlab talabalar shaharning markaziy ko‘chalaridan biri bo‘ylab yurish qilgan. Mitingda Falastinning Venesueladagi elchisi Fadi Alzaben so‘zga chiqqan. Diplomatning aytishicha, Isroil G‘azoda AQSh ko‘magida qirg‘inlar uyushtirmoqda.

Venesuela Universitet talabalari federatsiyasi rahbari Deyv Oliveros Isroilni falastinliklarga qarshi genotsid sodir etishda ayblagan.

“Venesuelaliklar hech qachon jim turmaydi. Ular (Isroil harbiylari) bolalarni o‘ldirmoqda, bu haqda barcha platformalarda gapirishimiz kerak. Biz bu yerga Falastin xalqining ozodligi uchun yig‘ildik”, dedi u.

Venesuelada mamlakat fuqarolarining faol ishtirokida Falastin bilan birdamlik namoyishlari tez-tez o‘tkaziladi.

• Venesuela
• miting