Raqobat qo‘mitasiga iste’molchi tomonidan “Asacar” avtosalonidan “Onix Premier” rusumli avtomobilni 221 640 000 so‘m narxda, 50 foiz boshlang‘ich to‘lov asosida xarid qilganligi bo‘yicha murojaat kelib tushgan.

Shuningdek, murojaatda iste’molchi avtomobilga gaz ballonini o‘rnatish maqsadida servis tekshiruviga olib borganida, ustki qismida bo‘yalgan joylar aniqlanganligi va bu holat yuzasidan avtosalon rahbariyatiga murojaat qilganligi ma’lum bo‘lgan.

Biroq, avtosalon tomonidan iste’molchiga avtomobilni yangisiga almashtirib berish rad etilgan. Shu sababli, iste’molchi Qo‘mitadan avtomobil bilan bog‘liq 10 500 000 so‘m miqdoridagi xarajatlarni qaytarib berilishida amaliy yordam so‘ragan.

Qo‘mita tomonidan holatga aniqlik kiritish maqsadida “UzAvto Motors” AJ bilan hamkorlikda murojaat o‘rganib chiqildi.

O‘rganish natijalariga ko‘ra, Qo‘mitaning sa’y-harakati bilan iste’molchiga “TOSHKENTDEU”(Asacar Autosentr diler) MCHJ tomonidan yangi avtomobil yetkazib berilgan va avtomobil bilan bog‘liq 10 500 000 so‘m miqdoridagi xarajatlar to‘liq qoplab berilishi ta’minlangan.

Shu tariqa, mazkur murojaat Qo‘mita tomonidan iste’molchi foydasiga ijobiy hal etilgan.

• Avtomobil
• Avtomobil uchun shartnoma
• avtosalon
• shartnoma