Alkogol mahsulotlarini noqonuniy muomalaga kiritilishining oldi olindi. Bu haqda Iqtisodiy jinoyatlarga qarshi kurashish departamenti xabar berdi.

Qayd etilishicha, Bosh prokuratura huzuridagi Departamentning Olmaliq shahar boʻlimi tomonidan tezkor tadbir oʻtkazilgan.

Unda “R-R.” MChJ taʼsischisi R.O. spirt mahsulotlarini noqonuniy muomalaga kiritish orqali daromad orttirishni koʻzlab, fuqaro R.ga hech qanday hujjati boʻlmagan jami 2 000 litr spirtni 6 200 AQSh dollarga sotgan vaqtida ashyoviy dalillar bilan ushlangan.

Xuddi shunday, Departamentning Yuqorichirchiq tuman boʻlimi tomonidan oʻtkazilgan tezkor tadbirda, fuqaro A.A, xorijda ishlab chiqarilgan Oʻzbekiston Respublikasi aksiz markasi bilan yelimlanmagan 180 dona “MARTINI” nomli alkogol mahsulotini xaridorga 32,4 mln. soʻmga sotgan vaqtida ashyoviy dalillar bilan ushlangan.

Maʼlum qilinishicha, hozirda mazkur holatlar yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qoʻzgʻatilib, tergov harakatlari oʻtkazilmoqda.

• Bosh prokuratura