Jinoyat ishlari bo‘yicha Shayxontohur tuman sudida mashina olib berishni va’da qilib 248 kishini 12 milliard so‘mga chuv tushirgan fuqarolarga hukm o‘qildi. Bu haqda Toshkent shahar sudlari xabar berdi.

Jabrlanuvchilarga ko‘ra, bir guruh shaxslar kredit evaziga “Nexia-3”, “Cobalt”, “Gentra”, “Malibu”, “Isuzu” rusumli avtomobillar olib berishni va’da qilib, ularga tegishli mablag‘larni o‘zlashtirgan va bir yildan beri aldab kelgan.

Ma’lum bo‘lishicha, fuqarolarning juda ko‘p miqdordagi mulkini firibgarlik yo‘li bilan qo‘lga kiritishni maqsad qilgan to‘rt nafar fuqaro 2020-yil 29-sentyabr kuni sudlanuvchi A.N. ta’sischiligida “Uz Avto Premium” MCHJ va “Avto Alo Group MT” MCHJni tashkil qilgan.

Korxona mas’ullari fuqarolarga avtomashinalarni kredit hisobiga olib berishni va’da qilib, boshlang‘ich to‘lov sifatida to‘langan pullarini bank muassasasi orqali qabul qilgan va MCHJ hisob raqamidagi jami 12 milliard so‘m atrofidagi pullarni MCHJning korporativ kartasi orqali naqd holatga keltirib, o‘z ehtiyojlariga ishlatib yuborgan.

Jinoyat kodeksining 168-moddasi (firibgarlik) 4-qismi “a,v” bandilari, 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 2-qismi “a,b” bandlari va 243-moddasi (jinoiy faoliyatdan olingan daromadlarni legallashtirish)da nazarda tutilgan jinoyatlarni sodir etgan 29 yoshli yigit 9 yil 6 oy, 26 yoshli yigit 9 yil va JKning 168-moddasi 4-qismi “a,v” bandilari, 228-moddasi 2-qismi “a,b” bandlari, 243-moddasi, 277-moddasi (bezorilik) 2-qismi “a,b” bandlarida nazarda tutilgan jinoyatlarni sodir etgan 27 yoshli yigit 8 yil 6 oy muddatga ozodlikdan mahrum qilindi.

30 yoshli sudlanuvchi qiz esa JKning 168-moddasi 4-qismi “v” bandi va 228-moddasi 2-qismi “a,b” bandlarida nazarda tutilgan jinoyatlarni sodir qilganlikda aybli deb topilib, 5 yil muddatga ozodlikni cheklash jazosi tayinlandi.