Muqaddam 3 marta sudlan firibgar fuqaroga qonunda belgilangan jazo tayinlandi. Bu haqda Oliy sud xabar berdi.

Ish holatlariga koʻra, sudlanuvchi Joʻra Baxtiyorov, 2018-yil A.Azizov va uning oʻgʻlini Amerika Qoʻshma Shtatlariga joʻnatishini aytib, uning ishonchiga kirgan holda, firibgarlik yoʻli bilan boʻlib-boʻlib jami 6.000 AQSh dollar pullarni olib, oʻzining shaxsiy ehtiyoji uchun ishlatib yuborgan.

Bundan tashqari, u 2020-yilning noyabr oyida B.Oqilovni aldab, oʻziga tegishli boʻlgan “Lacetti” rusumli avtomashinasi borligi, ushbu avtomashinani 9 000 AQSh dollariga sotishini aytib, ishonchga kirgan. 

Shundan soʻng, oldindan 1 600 AQSh dollari, 1 mln. soʻm pul va 10 gramm tilla taqinchoqlarini olib, unga “Lacetti” rusumli avtomashinasini bermasdan, jami 2 050 AQSh dollari miqdoridagi mol-mulklarini firibgarlik yoʻli bilan qoʻlga kiritib, shaxsiy ehtiyojlari uchun ishlatib yuborgan.

Sud tomonidan davlat ayblovchisining xulosasi, himoyachi fikri, sudlanuvchi Joʻra Baxtiyorovning, guvohlarning koʻrsatuvlari tinglandi.

Natijada jinoyat ishi hujjatlari va sudga taqdim etilgan dalillar atroflicha oʻrganib chiqilib, Joʻra Baxtiyorov Jinoyat kodeksining 168-moddasi 3-qismi “b” bandida nazarda tutilgan jinoyatni sodir etganlikda aybli deb topildi va unga qonunda belgilangan jazo tayinlanib, yetkazilgan moddiy zararlarni undirish belgilandi.

• Firibgarlik
• Sud