Ijtimoiy tarmoqlarda Buxoro viloyati Jondor tumanida bir guruh ayol gaz va elektr quvvati yo‘qligi sabab yo‘lni to‘sib qo‘ygani tasvirlangan video tarqaldi. Jondor tuman hokimligi bunga rasman munosabat bildirib, aholining gaz elektr ta’minoti bo‘yicha iddaolari mutlaqo asossiz ekanini ma’lum qildi.

"Joriy yilning 4-dekabr kuni Jondor tuman “Romish” MFY hamda “Oqtepa” MFYlar hududida istiqomat qiluvchi aholi “Oqtepa” MFY hududidan o‘tuvchi Gazli-Kogon yo‘nalishi bo‘yicha yangidan qurilayotgan yuqori bosimli magistral gaz quvuri qurilish ishlari olib borilayotganligi tufayli, ushbu qurilayotgan magistral gaz quvuridan tabiiy gaz ulab berilishini talab qilib mazkur hududdan o‘tuvchi yo‘l yoqasiga yig‘ilishgan" – deyiladi bayonotda.

Qayd etilishicha, Jondor tuman “Romish” MFY hududida joylashgan 660 ta hamda “Oqtepa” MFY hududida joylashgan 653 ta aholi xonadonlarini kafolatlangan yoqilg‘i resurslarlari bilan ta’minlangan, mazkur hududlarda tabiiy gaz ta’minoti tanqisligi kuzatilganligi sababli 2016-yil iyul-sentyabr oylarida hukumatning tegishli  qarorlari va topshiriqlari asosida bosqichma-bosqich suyultirilgan gaz ta’minotiga moslashtirish ishlari amalga oshirilgan.

Shu qatori, joriy yilning 29-noyabr – 3-dekabr kunlari “Jondortumangaz” ta’minoti bo‘limi belgilangan tartibda “Romish” MFY hamda “Oqtepa” MFY iste’molchilariga suyultirilgan gaz yetkazib bergan. Ya’ni, qishloq aholisiga tuman hokimligi tomonidan tasdiqlangan reja-jadvalga asosan belgilangan tartibda uzluksiz suyultirilgan gaz yetkazib berilmoqda.

"Jondor tuman elektr ta’minoti korxonasining ma’lumotiga ko‘ra, tumandagi Oqtepa MFY Oqtepa va Urganjilar qishlog‘ida 2017-yil “Obod qishloq” Dasturi bo‘yicha har ikkala qishloqlarda ham qo‘shimcha 3 donadan yangi 63 va 100 kVA quvvatli transformatorlar o‘rnatilib, elektr ta’minoti yaxshilangan. Aholi xonadonlarida elektr ta’minotida hech qanday uzilishlar mavjud emas" – deydi Jondor tuman hokimligi axborot xizmati.

• Buxoro
• Elektr energiyasi
• Gaz