Germaniya hukumati Ukrainaga 100 ming dona himoya vositalari – o‘q o‘tmas nimcha va dubulg‘alarni yetkazib beradi.   

Bu haqda Ukainaning GFRdagi elchisi Andrey Melnik o‘zining Twitter sahifasida yozib qoldirdi.

“Kiyev Berlindan Ukraina qurolli kuchlari bilan yonma-yon turib, mamlakatni Rossiya bosqinidan himoya qilishga tayyor bo‘lgan ko‘ngillilar uchun 100 ming dona zirhli nimcha va dubulg‘alar jo‘natishini kutyapti”, – deb yozgan u.

Melnik, shuningdek, qator nufuzli nemis OAVlari tufayli uning murojaati nemis nashrlarida asosiy yangilik sifatida aylanayotganini qo‘shimcha qildi. U Ukraina yetkazib beriladigan himoya vositalari uchun minnatdor bo‘lishini, biroq Kiyevga Germaniyadan mudofaa qurollari kerakligini ta’kidladi.

“Ukraina Berlindan nafaqat himoya vositalariga, balki Putinni (RF prezidenti, -tahr) cho‘chitadigan darajadagi Rossiyaning keng ko‘lamli hujumidan samarali himoyani ta’minlash uchun kuchli mudofaa qurollariga ham muhtoj”, – dedi u.

Eslatib o‘tamiz, bir muddat oldin Qo‘shma Shtatlar Ukrainaga o‘z harbiy yordamlari ortilgan yuk samolyotlarini jo‘natayotgani haqida xabar berilgan edi.

Ayrim manbalarga ko‘ra, ayni paytda Amerikadan Ukrainaga qurol aslaha ortilgan to‘rtinchi samolyot uchayapti.

Shuningdek, AQSH Boltiqbo‘yi mamlakatlari (Estoniya, Litva va Latviya) rahbarlari tomonidan Ukrainaga Amerikada ishlab chiqarilgan qurollarni topshirishni ham ma’qullagan.

Buyuk Britaniya esa har qanday ehtimoliy Rossiya bosqinining oldini olish uchun Ukrainaga ko‘proq qurol berishga tayyor ekanligini bildirgan.

• Rossiya
• Ukraina
• Xorij