Germaniyada ishlash istagida boʻlgan oʻzbekistonlik fuqarolar nemis mutaxassislari yordamida monomarkazda kasb-hunarga, Toshkentdagi Gyote instituti bilan hamkorlikda nemis tiliga oʻqitiladi.

Oʻzbekiston va Germaniya oʻrtasida navbatdagi ikki tomonlama manfaatli uchrashuv boʻlib oʻtdi. Bu haqda Bandlik va mehnat munosabatlari vazirligi xabar berdi.

Uchrashuvda vazir Nozim Xusanov Germaniya Federativ Respublikasining Toshkentdagi Favqulodda va Muxtor Elchisi Dr. Tilo Klinner, uning iqtisodiy masalalar boʻyicha yordamchisi Ralf Maurederni qabul qildi.

Tadbirda Germaniya Federativ Respublikasi hududida ishlash istagida boʻlgan oʻzbekistonlik fuqarolarni nemis mutaxassislari yordamida monomarkazda kasb-hunarga oʻqitish, Toshkentdagi Gyote instituti bilan hamkorlikda nemis tiliga oʻrgatish masalalari muhokama qilindi. 

Bu boʻyicha yoʻl xaritasi ishlab chiqilib, mazkur jarayon ishchi guruh tomonidan olib borilishi taʼkidlandi.

Shuningdek, kelgusida Oʻzbekiston Respublikasi fuqarolarini Germaniya Federativ Respublikasi hududida vaqtinchalik mehnat faoliyatini amalga oshirish uchun tashkiliy ravishda jalb qilish boʻyicha hamkorlik qilishga kelishib olindi.

• Vazirlik