2021-yil 8-dekabr kuni sotsial-demokrat siyosatchi Olaf Shols Germaniyaning yangi federal kansleri etib saylandi. Unga Bundestagning 395 deputati ovoz bergan.
Germaniya Konstitutsiyasining 63-moddasiga ko‘ra, kansler parlament saylovidan so‘ng Bundestag tomonidan saylanadi va uni federal prezidentga tasdiqlash uchun taklif qiladi. Kamida 369 deputatning ovozini olgan nomzod kansler bo‘lishi mumkin. 
Ta’kidlanishicha, Olaf Shols nafaqat o‘zining Germaniya sotsial-demokratik partiyasi, balki Yashillar va Erkin demokratik partiya ham qo‘llab-quvvatlagani tufayli g‘alaba qozongan. Aynan shu uch siyosiy kuch GFR’dagi yangi hukmron koalitsiyani tashkil qiladi.
Ma’lumotlarga ko‘ra, Olaf Shols Germaniyaning to‘qqizinchi kansleri bo‘ldi. U 1958-yilda Osnabryuk shahrida tug‘ilgan, huquqshunoslik bo‘yicha tahsil olgan, muqobil harbiy xizmatni o‘tagan va advokat bo‘lib ishlagan. Olaf Shols ikki marta – 1998-2001 va 2002-2011 yillarda Bundestag deputati bo‘lgan. 2007-2009 yillarda federal hukumatda Mehnat vaziri, 2011-2018 yillarda Gamburgning birinchi burgomistri bo‘lib ishlagan. 2018-yil mart oyidan Moliya vazirligini boshqarishga kirishib, bir vaqtning o‘zida vitse-kansler lavozimini egallagan.
Qayd etilishicha, saylov kompaniyasi paytida Olaf Shols ko‘pincha xarizmasi yo‘qligi uchun tanqid qilingan. O‘tkazilgan so‘rov natijalariga ko‘ra, nemislarning deyarli uchdan ikki qismi Olaf Shols kansler lavozimida to‘rt yildan ortiq qoladi deb o‘ylamaydi.

• Germaniya
• saylov