Hayotini IT bilan bog‘lagan yoki bog‘lash niyatida bo‘lganlar Google`da ishlashni bir marotaba bo‘lsa ham orzu qilib ko‘rishadi. Aslida buning qiyin joyi yo‘q. Bilim, ko‘nikma va quyidagi bosqichlardan o‘tsangiz bo‘lgani.

1 – bosqich. Google`da rezyumelarga alohida e’tibor qaratiladi. Har yilgi yuzlab murojaatlar orasidan kompaniya ularning bir necha yuztasini saralab oladi. Bunda siz rezyumeingizga e’tiborli bo‘ling. Unda quyidagilar yozilgan bo‘lishi maqsadga muvofiq:

- elektron pochta va aloqa uchun telefon;
- barcha ta’lim olgan muassasalaringiz va qo‘shimcha ta’lim nomlari;
- ish tajribangiz;
- shaxsiy fazilatlar;
- xobbi;
- til bilish darajangiz.

Rezyumeda ish tajribangizni yozish muhim ahamiyat kasb etadi. Rezyumeda nimalarni yozish tavsiya etilmaydi:

- tug‘ilgan sanangiz va shaxsiy ma’lumotlar;
- haydovchilik guvohnomangiz bor yoki yo‘q ekanligi;
- oilaviy holatingiz.

Har ehtimolga qarshi rezyumeni ingliz tilida yozing. Iloji boricha, uning dizayniga e’tibor qarating. Lekin yorqin ranglar, ko‘p suratlar va ma’lumotni o‘qishni qiyinlashtiradigan dizaynlardan foydalanmang. O‘z suratingizning sifatiga ham alohida e’tibor qarating.

2 – bosqich. Bo‘sh ish o‘rnini qidirish.

Bo‘sh ish o‘rnini topishingiz uchun google.com/jobs ga kirishingizning o‘zi kifoya.

3 – bosqich. Rezyumeni yuborish.

Barchasi juda oddiy. O‘zingizga mos kelgan bo‘sh ish o‘rniga elektron manzil orqali rezyumeingizni yuboring va sizga qayta aloqaga chiqishlarini kuting. Agarda sizning ish tajribangiz to‘g‘ri kelsa, siz bilan bog‘lanishadi.

4 – bosqich. Suhbatga tayyorgarlik.

Yuqoridagi 3 bosqichdan o‘tganingizdan so‘ng, kompaniya tomonidan suhbat vaqti va muhokama qilinishi mumkin bo‘lgan mavzular yozilgan xabarni olasiz.

5 – bosqich. Telefondagi suhbat.

Bu suhbat jarayonida sizga oddiy va oson savollar beriladi. Asosiy e’tibor umumiy tushunchalar va kutuvlar haqida bo‘ladi. Bu suhbat davomida 90% savol ish beruvchi tomonidan beriladi.

Birinchi suhbatdan ko‘ngildagidek o‘tishingiz uchun internetdagi ish va soha doirasidagi tushunchalar, ma’lumotlar bilan tanishib borishingiz tavsiya etiladi.

6 – bosqich. Texnik suhbat.

Agarda siz telefon orqali bo‘lgan suhbatdan muvaffaqiyatli o‘tgan bo‘lsangiz, kompaniya tomonidan tabrik va keyingi suhbat sanasi ma’lum qilingan elektron xabar olasiz.

Texnik suhbatda nimalar haqida savol berilishi ochiqlanmagan, lekin ba’zi ma’lumot va taxminlarga ko‘ra, sohaga oid savollar va dunyoqarashingiz, mantiqiy fikrlashingizni tekshirish uchun savollar berilishi mumkinligi aytilgan.

7 – bosqich. Jonli suhbat.

6 – bosqichdan ham o‘tsangiz, endi sizni kompaniyaga jonli suhbatga taklif etishadi. Suhbat kompaniya (mahalliy yoki siz ishlashni rejalashtirayotgan) ofisida bo‘lib o‘tadi va kelganingiz uchun sizga haq to‘lanadi.

Suhbat 4-5 nafar Google xodimlari tomonidan olib boriladi.

8 – bosqich. Ish taklifi.

7 – bosqichda siz bilan suhbatlashgan 4-5 xodimning barchasi nomzodingizni munosib deb topsa, kompaniya sizni ishga taklif qiladi. Ish taklifi tafsilotlari, suhbatdagi barcha savollar himoyalanadi va bu haqda tashqaridagilarga ma’lumot tarqatish mumkin emas.

Qo‘shimcha ma’lumotlar:

1. Sizga har bir bosqichga o‘tganingizda xabar yuborayotgan insonga javob xati yoki savollaringizni yuborishingiz mumkin.

2. Sir saqlanishi kerak bo‘lgan ma’lumotlarni oshkor qilmang.

3. Ingliz tilini chuqur o‘rganing. Chunki suhbatlarda ham bunga alohida e’tibor qaratiladi va shu tilda faoliyat olib borasiz.

4. Shoshqaloqlik yaramaydi. Rezyume yuborganingizdan to oxirgi bosqichga kelguningizga qadar 1 oy vaqt ketadi.

5. Google`da ishdan bo‘shatilish juda oson. Shu sababdan ham o‘z ustingizda doimo ishlang.

6. Birinchi urinish muvaffaqiyatsizlik bilan yakunlansa, 6 oydan so‘ng yana shu lavozimga hujjat topshirishingiz mumkin.

Yuqoridagi 8 bosqichdan o‘tganingizdan so‘ng siz dunyoning eng katta kompaniyalaridan birining xodimiga aylanasiz. O‘zingizni sinab ko‘ring. Omad yor bo‘lsin.