Shveysariya Federal Jinoyat sudi Gulnora Karimovaga aloqador shirkatga tegishli 293 million AQSh dollardan ortiq mablag‘ni musodara qilishga qaror qilgani haqida xabar berilgandi. O‘zbekiston Adliya vazirligi sud qarori yuzasidan izoh berdi.

Ma’lum qilinishicha, bu Shveysariya huquqni muhofaza qiluvchi organlari uchun muhim g‘alaba hisoblanadi. Chunki u mablag‘larni O‘zbekistonga qaytarish bo‘yicha keyingi muzokaralar uchun imkoniyat ochadi.
Shu bilan birga, sud qaroriga ko‘ra 70 million AQSh dollari miqdoridagi mablag‘lar prosessual xarajatlar chiqarib tashlanganidan so‘ng “Takilant Ltd” kompaniyasiga qaytarilishi mumkin. Qayd etilishicha, ayrim OAV sud qarorining ushbu qismini noto‘g‘ri talqin qilgan holda asossiz ma’lumotlar tarqatmoqda.

Ta’kidlanishicha, Shveysariya federal jinoyat sudining 2021-yil 17-dekabrdagi qarori hali yakuniy qaror emas. Xususan, Shveysariya huquqni muhofaza qiluvchi organlari sudning ushbu qarori ustidan shikoyat qilish huquqiga ega.”Bundan tashqari, ushbu mablag‘larga nisbatan Amerika Qo‘shma Shtatlarining vakolatli organlari tomonidan ularni hibsga olish to‘g‘risida da’vo va order ham mavjud, bu esa Shveysariya sudining ko‘rsatilgan qarori kuchga kirgan taqdirda ham ushbu mablag‘larni kompaniyaga qaytarish imkonini bermaydi”, - deyiladi xabarda.

Ma’lum qilinishicha, ayni paytda O‘zbekiston davlat organlari Shveysariya va AQSh rasmiylari bilan Gulnora Karimova va uning sheriklarining jinoiy faoliyati natijasida orttirilgan aktivlarini qaytarish bo‘yicha faol ish olib bormoqda. Chunki ushbu jinoyatlardan O‘zbekiston davlati va xalqi ham jabr ko‘rgan.

Ma’lumot uchun, Karimovaga tegishli bo‘lgan Takilant nomli shirkat jinoiy tergov ostidagi 5 ta Shveysariya bank hisoblaridan ikkitasiga aloqador edi. Kompaniyadan musodara qilingan umumiy summa 350 million dollardan ortiqni tashkil qilgan.
Sud bu summaning katta qismi musodara qilinishi kerak degan xulosaga keldi, chunki ayblanuvchilarning bir qismi, jumladan, Karimova va uning yordamchisi jinoiy pul yuvishda aybdor deb topilgan. Biroq Takilant’ga taxminan 70 million AQSh dollar qaytarilishi aytilgan. 

• Adliya
• Shveysariya
• Sud