“Hamkorbank” ATBning onlayn mikroqarz bank xizmati reklama axborotida iste’molchilarni chalg‘ituvchi ma’lumot berilganligi aniqlangan. Bu haqda Raqobat qo‘mitasi o‘zining rasmiy sahifasida ma’lum qildi.

Xususan, mazkur bank xizmati reklamasida “Onlayn mikroqarz” – “Zudlik bilan pul kerakmi, 50 million so‘m - Hamkor ilovasida onlayn mikroqarz rasmiylashtiring!” mazmunidagi tashqi reklama joylashtirilganligi kuzatilgan.

Shundan so‘ng ushbu axborotga bankning internetdagi rasmiy sahifasiga joylashtirilgan ma’lumotlar asosida aniqlik kiritildi.

Qayd etilishicha, bunda, mikroqarz bank xizmati bo‘yicha faqatgina kreditning miqdori haqida axborot berilgan bo‘lib, reklama axborotida ushbu kreditning qolgan muhim shartlari ko‘rsatilmagan. Reklamaning bunday ko‘rinishda bo‘lishi esa reklamadan foydalanuvchilarni chalg‘ituvchi yoki chalg‘itishga olib keluvchi holatni ifodalashi mumkin.

Hozirda yuqoridagi sabablarga asoslangan holda, Qo‘mitaning Maxsus komissiyasi tomonidan “Reklama to‘g‘risida”gi Qonun talablari buzilish alomatlari yuzasidan “Hamkorbank” ATBga nisbatan belgilangan tartibda moliyaviy jarima qo‘llash haqida qaror qabul qildi.

• Hamkorbank
• Jarima