Rossiyaning Rostov viloyati Novocherkassk shahrida yashovchi 13 yoshli o‘smir hammomda telefon orqali gaplashayotgan vaqtida vafot etdi. Bu haqda mahalliy nashrlar xabar berdi.

Viloyat huquq-tartibot idoralarining bildirishicha, holat 21-sentyabrga o‘tar kechasi sodir bo‘lgan. Dastlabki ma’lumotlarga ko‘ra, yettinchi sinf o‘quvchisi cho‘milishga o‘zi bilan smartfonini olib kirgan. U gajetni quvvatga ulagan va bir vaqtning o‘zida qo‘l telefoni orqali suhbatlashgan.

Aniqlanishicha, qurilma vannaga tushib ketgan, suvning ichida bo‘lgan qiz esa tok urishidan vafot etgan.

“Suv yaxshi elektr o‘tkazuvchi hisoblanadi. 220 volt esa juda katta kuchlanish: tok urishi oqibatida yurak to‘xtab qolishi mumkin. Shuning uchun yuvinish xonasiga elektr jihozlarini olib kirmaslikni tavsiya etamiz”, deydi 15 yillik tajribaga ega rostovlik elektrchi.

Tergov qo‘mitasi viloyat boshqarmasining izoh berishicha, qiz o‘sha vaqtda quvvatlanayotgan telefonini suvga tushirib yuborgan.

“Ushbu fakt yuzasidan tergovga qadar tekshiruv olib borilmoqda. Hozirda ushbu holatga nisbatan sud-tibbiy ekspertizasi tayinlangan. Voqea sodir bo‘lgan barcha jarayonlarni aniqlashga qaratilgan tekshiruvlar o‘tkazilyapti”, deyiladi departament xabarida.

• Rossiya
• Telefon
• elektr