Hirot shahridagi ayollar kafesining faoliyati “Tolibon” tomonidan to‘xtatilgan. Bu haqda Hasht-e Subh Daily xabar bermoqda.

Afg‘oniston muvaqqat hukumatining Hirotdagi shtab-kvartirasi kafe yopilganini tasdiqlagan. Xabarlarga ko‘ra, aniq bir sababsiz kafe muhrlab qo‘yilgan.

O‘zini “Tolibon” deb tanishtirgan guruh agentlari avvalroq kafelarni yopish bilan tahdid qilgan. Ular kafedagi ayollar hijobga rioya qilmasligi, musiqa tinglashini vaj sifatida ko‘rsatgan.

“Tolibon” harakati ayollarga erkaklar bo‘lgan restoran va kafelarga borishni taqiqlaganidan so‘ng, Hirot shahrida faqat ayollarga xizmat ko‘rsatadigan beshta kafe ochilgan edi.

Tadbirkorlar ovqatlanish nuqtalarining yopilishi 7 ming dollardan 22 ming dollargacha zarar keltirishini aytmoqda. Bundan tashqari, ko‘plab ayollar ishsiz qoladi, ularning aksariyati oilasining yagona boquvchisi hisoblanadi.

Afg‘oniston hukumati sentyabrda 35 moddadan iborat fazilatlar va illatlarga oid yangi qonunlarni e’lon qilgandi. Ushbu qoidalar ayollarning qo‘shiq aytish va ommaviy o‘qishini taqiqlaydi.

• Afg‘oniston
• Ayollar
• Tolibon
• taqiq