Shavkat Mirziyoyev arxitektura, qurilish va shaharsozlik sohasidagi ustuvor vazifalarga bagʻishlangan videoselektor yigʻilishida qurilish va loyihalash ishlarini tartibga solish boʻyicha yangi tizim joriy qilinishini aytdi.

“Umuman, qurilish bilan boʻlib, arxitektura orqada qolib ketdi. Shu bois, mahalla, tuman (shahar), viloyat va respublika darajasida qurilish va loyihalash ishlarini tartibga solish boʻyicha yangi tizim joriy qilinadi”, – dedi davlatimiz rahbari.

Bosh va master rejalarni ishlab chiqish yangicha yondashuv asosida 3 ta bosqichdan iborat boʻladi.

Birinchi bosqichda Respublika kengashi hududning ixtisoslashuvi, transport-logistika, sanoat va xizmat loyihalarini joylashtirish uchun yer va infratuzilmaga ehtiyoji va chegaralarini belgilaydigan Bosh sxemasini ishlab chiqadi.

Bunda yaqin (5 yillik), oʻrta (10 yillik) va uzoq (20 yillik) muddatlarda iqtisodiy, ijtimoiy va ekologik mezonlar asosida viloyatning rivojlanish koʻrsatkichlari belgilanadi.

Ikkinchi bosqichda bosh sxemalar asosida loyiha ofisi hududning Bosh rejasini ishlab chiqadi. Bunda:

- viloyatning ixtisoslashuviga qarab, sanoat, xizmat koʻrsatish va aholi yashash punkti kabi zonalarga ajratiladi, yoʻllar va infratuzilma tarmoqlarini taqsimlash koʻzda tutiladi.

- hududiy loyihalarni tasdiqlash, obyektlarga qoʻyilgan talablarni belgilashni viloyat bosh arxitektori va hokimning birinchi oʻrinbosari hal qiladi;

Uchinchi bosqichda bosh rejalarga asosan, viloyat, tuman va shahar bosh arxitektorlari va hokimning birinchi oʻrinbosarlari oʻz hududining master rejalarini tasdiqlaydi.

Bunda, ajratilgan zonalardagi maktab, bogʻcha, shifoxona, uy-joylar, savdo va xizmat koʻrsatish obyektlarining joylashuvi koʻrsatiladi.

Tuman, shahar bosh arxitektori va hokimlarning 1-oʻrinbosarlari hokim yordamchilari va mahalliy tadbirkorlar bilan hududiy loyihalarni ishlab chiqib, yerlarni auksionga chiqaradi.

Loʻnda qilib aytganda, Qurilish vazirligi qaysidir mahallada lotok qayerdan oʻtishi yoki bino qanday yoritilishi kerak, degan masalalar bilan shugʻullanmaydi. Bular tuman va mahalla darajasida hal boʻladi.

Bosh sxema, Bosh reja va master rejalar ishlab chiqish uchun joriy yilda 200 milliard soʻm ajratiladi.

Mutasaddilarga 1-oktyabrga qadar Respublika va Samarqand, Namangan va Toshkent viloyatlarining Bosh sxema, Bosh reja va master rejalarini ishlab chiqishga xorijiy loyiha tashkilotlarini jalb qilish topshirildi.

Shuningdek, ikki oy muddatda:

- master rejalarini ishlab chiqishda, aholi takliflarini jamlaydigan “Mening mahallam” platformasini ishga tushirish;

- barcha tuman va shahar qurilish boʻlimlariga malakali arxitektorlarni rahbar etib tayinlash;

- sohaga xususiy sektorni jalb qilish uchun bosh rejalar loyihasini tayyorlashga qoʻyiladigan talablarni qayta koʻrib chiqish vazifasi qoʻyildi.

• Prezident
• Shavkat Mirziyoyev
• Videoselektor