Bugun, 13-iyun soat 9:50 da Andijon shahar “Yangi bozor” savdo majmuasida o‘zini “Ilyos” deb tanishtirgan IIB xodimi tomonidan shakar savdosini suratga olayotgan Human.uz xodimi J.Abdullayevning xizmat telefoni “videoga olish qonunga zid” degan iddao bilan kuch ishlatish yo‘li bilan tortib olingani aytildi. 

Xabarda aytilishicha, jurnalistning urinishlardan so‘ng ham smartfon qaytarib berilmagan. Xodim unga o‘zining kuch ishlatgani va telefonni tortib olgani aks etgan tasvirlarni o‘chirib yuborish  sharti bilan telefonni qaytarishini aytgan.

Mazkur holat yuzasidan IIV matbuot kotib Sh.G‘iyosov munosabat bildirdi. Uning taʼkidicha, jurnalist odamlarning shakarga navbatini va o‘zaro gap talashayotganliklarini tasvirga olishga uringan va bu vaqtda, fuqarolar tomonidan ularning yuzlarini tasvirga olishiga eʼtiroz bildirilib, huquqlarini poymol qilmasdan tasvirni o‘chirib tashlash talab qilingan.

Jamoat tartibini buzilishini oldini olish maqsadida, bozor hududiga biriktirilgan IIO xodimi tomonidan jurnalistga fuqarolarni roziligisiz ularni tasvirga olmaslik tushuntirilgan.

Hozirda, shakarga navbatda turgan fuqarolar va J.Abdullayev o‘rtasidagi ziddiyatga oydinlik kiritish maqsadida voqea ishtirokchilari IIBga olib borilgan. 

Qonunchilik palatasi deputati Rasul Kusherbayev esa jurnalist voqea hodisalarni tasvirga olishda umumiy fondagi fuqarolarning har birini yuzini tasvirga tushishiga ulardan ruxsat olishi qonunda yo‘qligini taʼkidlamoqda.

“Kimki istamasa, kameradan yuzini burishi mumkin. Yoki video tarqatilishidan oldin jurnalistdan o‘zining yuzini ko‘rsatmaslikni so‘rashi mumkin. Axborot to‘plab, tarqatish jurnalistning professional faoliyati hisoblanadi. Fuqaroning so‘rovi qoniqtirilmagan taqdirda fuqaro bu bo‘yicha fuqarolik sudiga murojaat qilishga haqli.

Ichki ishlar vazirligi vakilining iib xodimlarining jurnalistdan majburan tasvirga olish uskunasini tortib olgan holatini bu tarzda xaspo‘shlashi absurd va mantiqsiz”, – deb yozadi deputat.

Kusherbayev, shuningdek, vaziyatga bunday uslub bilan yondashish ichki ishlar tizimi obro‘sini oshirmasligini, aksincha, to‘kishini aytib, holatga vazirning shaxsan o‘zining eʼtibor qaratishi zarurligini taʼkidlaydi.

• Andijon
• IIV
• Kusherbayev
• Munosabat