Kuni kecha Qashqadaryoda viloyat, tuman va shahar Kengashlari deputatlarining qoʻshma majlisi boʻlib oʻtgandi. Unda Qashqadaryo viloyat hokimi Murodjon Azimov Oliy Majlis Senati aʼzoligiga saylangandi.

Shundan soʻng, Oliy Majlis Qonunchilik palatasi deputati Rasul Kusherbayev oʻzining Telegram kanalida viloyat hokimlarini senator boʻlib saylanishini tanqid qildi.

Oʻzbekistondagi mantiqsiz amaliyotlardan biri viloyat hokimlarining Senat aʼzoligiga saylanishi davom etmoqda.

Kuni kecha Qashqadaryoda viloyat, tuman va shahar Kengashlari deputatlarining qoʻshma majlisi boʻlib oʻtgan. Va unda Senat aʼzosi saylovi boʻlib oʻtgan.

Oʻta “demokratik” talablar asosida oʻtgan saylovda kutilmaganda viloyat hokimi M.Azimov Senat aʼzoligiga saylanibdi.

Shu negadir bizda barcha viloyat hokimlari doimo senator etib saylanaverishadi, hech bir nomzod ularni yenga olmaydi.

Balki shuncha odamni saylov, deb ovora qilmay kim viloyat hokimi etib tayinlansa unga “avtomatik” ravishda senatorlik nishonini ham topshirgan maʼquldir. Resurs va asab iqtisod boʻlardi. Chunki boshqa nomzodlar qancha chiranmasin bari-bir viloyat hokimini ortda qoldirib, senator boʻla olmaydi. Shu kungacha biz bunaqasini koʻrmaganmiz.

Endi gapni dangaliga oʻtsak. Bilasizmi aslida bu absurd:  ijro hokimiyati vakili bir vaqtni oʻzida qonun chiqaruvchi hokimiyatda ham vakil boʻlmoqda. Va bu hokimiyatlar boʻlinish prinsipiga, demokratik tamoyillarga mos kelarmish.

Endi mana shunday mantiqsiz va kulguli ahvolni bartaraf etish, haqiqiy demokratik talablarga mos amaliyotga oʻtish uchun ham sud va qonun chiqaruvchi (parlament) vakili boshqa hokimiyat vakili boʻla olmaganidek, ijro hokimiyati vakillari, xususan hokimlarning ham qonun chiqaruvchi(Senat) hokimiyat vakili boʻlishi mumkin emasligini Konstitutsiyada mustahkamlab qoʻyishimiz shart.

Shunda hokimiyatlar boʻlinishi prinsipini demokratik tamoyillarga mos, desa boʻladi. Ungacha senatorlikka saylovlarda doimo hozircha viloyat deputatlarining ham boshligʻi hisoblangan viloyat hokimlari gʻolib boʻlib chiqaveradi.

• Kusherbayev
• Senat
• hokim