Milliarder Ilon Maskning shaxsiy akkaunti “Twitter” ijtimoiy tarmog‘ida obunachilar soni bo‘yicha AQSH sobiq prezidenti Barak Obamaning sahifasini ortda qoldirib, eng ko‘p o‘qilgan sahifaga aylandi. Bu haqda 30-mart kuni Ginnesning rekordlar kitobi rasmiy saytida xabar berildi.

Ilon Mask 44 milliard dollarga platformani sotib olganidan keyin besh oy o‘tib “Twitter”da eng ko‘p kuzatuvchiga ega bo‘ldi. 133 million o‘quvchi bilan 51 yoshli texnologiya magnati 2020-yildan buyon rekord o‘rnatgan AQSHning sobiq prezidenti Barak Obamani ortda qoldirgan.

Ginnesning rekordlar kitobi ma’lumotiga ko‘ra, har oyda 450 millionga yaqin odam platformadan foydalanadi, ularning 30 foizi aynan Maskning sahifasiga obuna bo‘lgan. Biznesmen 2022-yil oktyabr oyida “Twitter”ni sotib olish bo‘yicha shartnoma imzolaganidan beri uning akkauntiga 23 milliondan ortiq foydalanuvchi qo‘shilgan. Har kuni 100 mingga yaqin odam milliarderga obuna bo‘ladi.

2022-yil 27-oktyabrda tadbirkor “Twitter”ni sotib olish bo‘yicha 44 milliard dollarlik shartnomani yopdi. Shundan so‘ng darhol kompaniya rahbariyatining bir qator a’zolarini, jumladan, bosh direktor Parag Agraval va moliya direktori Ned Segalni ishdan bo‘shatdi. AQSH Qimmatli qog‘ozlar va birjalar komissiyasining ma’lumotlar bazasiga joylashtirilgan hujjatlardan ma’lum bo‘lishicha, Mask direktorlar kengashini ham tarqatib yubordi va kompaniyaning yagona rahbari bo‘ldi.

Avvalroq “Wall Street Journal” nashri o‘tgan yilning dekabr oyida reklama beruvchilar hamkorlik qilmagani sababli “Twitter”ning daromadi taxminan 40 foizga kamaygani haqida xabar bergan edi.