Amerikalik tadbirkor Ilon Mask Twitter foydalanuvchilaridan “Tesla” kompaniyasining unga tegishli boʻlgan aksiyalaridan 10 foizini sotish yoki sotmaslik haqidagi fikrlarini soʻradi.

“Soʻnggi vaqtlarda amaliy boʻlmagan daromad – soliqlarni toʻlashdan qochish vositasi ekanligini koʻp gapirishyapti, shuning uchun “Tesla”dagi oʻz aksiyalarimdan 10 foizini sotishni taklif qilaman”, deb yozdi milliarder. U blog kuzatuvchilarining bu boradagi fikrlarini soʻrab, taklif uchun ovoz berish imkoniyatini taqdim qilgan.

“Har qanday holatda ham soʻrovnoma natijalariga amal qilaman”, dedi Mask. Ayni vaqtda milliarderning taklifiga 500 000 dan ortiq foydalanuvchi ovoz berib boʻlgan.

“Men hech qayerdan naqd pul koʻrinishidagi maosh yoki bonuslar olmayman. Menda faqat aksiyalar bor, shu sababli men uchun soliqlarni toʻlashning yagona yoʻli – aksiyalarni sotishdir”, dedi tadbirkor.

Eslatib oʻtamiz, 2021-yilning 1-noyabr holatiga koʻra, Mask daromadi 300 milliard AQSh dollaridan oshgan tarixdagi birinchi odamga aylangan.

• milliarderlar