Indoneziyaning Malang shahridagi stadionda yuz bergan tartibsizliklar natijasida kamida 127 kishi halok bo‘ldi, 200 ga yaqin kishi jarohat olgan.

“The Guardian” nashri tarqatgan ma’lumotga ko‘ra, halok bo‘lganlar orasida ikki nafar politsiyachi ham bo‘lgan.

Qayd etilishicha, tartibsizliklar futbol o‘yinida jamoalardan birining mag‘lubiyatidan keyin boshlangan. Har ikki jamoa muxlislari maydonga yugurib chiqishgan, ular o‘rtasida mushtlashuv kelib chiqdi.

Politsiya ko‘zdan yosh oqizuvchi gaz ishlatgan. Natijada stadionda vahima va tiqilinch boshlandi, deyiladi xabarda.

Sog‘liqni saqlash boshqarmasi boshlig‘i Malangdagi o‘lim sabablari tartibsizlik, ulkan olomon va bo‘g‘ilish ekanligini qayd etgan. Uning so‘zlariga ko‘ra, 120 dan ortiq kishi halok bo‘lgan, jabrlanganlar soni aniqlanmoqda, ularning barchasi shahar shifoxonalariga yuborilgan.

• Futbol
• Halokat
• Indoneziya