BMTning inson huquqlari boʻyicha Oliy komissari Mishel Bachelet Qoraqalpogʻistonda boʻlib oʻtgan norozilik namoyishlari chogʻida 18 kishi halok boʻlgani yuzasidan zudlik bilan mustaqil va shaffof tergov qilishga chaqirdi.

Bosh prokuratura maʼlumotlariga koʻra, Nukusda namoyishchilar va xavfsizlik kuchlari oʻrtasidagi toʻqnashuvlar chogʻida 18 kishi halok boʻlgan, 243 kishi yaralangan.

“Oʻlganlarning shaxsini darhol aniqlashning imkoni boʻlmadi. Xabar qilinishicha, ular boshi va tanasidan oʻq yegan. Qurbonlarning haqiqiy soni bundan ham koʻp boʻlishi mumkinligidan xavotir bor”, — deyiladi Oliy komissar bayonotida.

Mishel Bachelet rasmiylarni namoyishlar paytida oshkoralikni taʼminlashga, noqonuniy faoliyat haqidagi har qanday ayblovlar boʻyicha zudlik bilan shaffof va mustaqil tergov boshlashga chaqirdi.

Namoyishlar vaqtida va undan keyin 500 dan ortiq odam hibsga olingan, deyiladi xabarda.

“Odamlar oʻz huquqlarini amalga oshirgani uchun jinoiy javobgarlikka tortilmasligi kerak. Oʻzbekiston aʼzo boʻlgan fuqarolik va siyosiy huquqlar toʻgʻrisidagi xalqaro paktga koʻra, har bir inson oʻz fikrini bildirish, tinch yigʻilishlar va jamoat ishlarida ishtirok etish huquqiga ega”, – deyiladi Oliy komissar bayonotida.

Uning qoʻshimcha qilishicha, barcha mahbuslar advokat bilan tez uchrashishi va tegishli jarayon hamda adolatli sud muhokamasi kafolatlanishi zarur. Shuningdek, u hukumatni internetdagi cheklovni olib tashlashga chaqirgan.

• BMT
• Qoraqalpog‘iston