Intellektual mulk agentligining vazifalari Adliya vazirligiga yuklatilmoqda. Bu haqda Oliy Majlis Qonunchilik palatasi matbuot xizmati xabar berdi.

Kecha, 26-sentabr kuni Oliy Majlis Qonunchilik palatasidagi “Milliy tiklanish” demokratik partiyasi fraksiyasining navbatdagi yig‘ilishida dastlab “O‘zbekiston Respublikasining Jinoyat-prosessual kodeksiga qo‘shimchalar kiritish to‘g‘risida”gi qonun loyihasi muhokama qilindi.

Qayd etilishicha, ushbu hujjat jinoyatlarni fosh etish borasidagi faoliyatning tezkorligi va sifati oshishi, tezkor-qidiruv faoliyatini amalga oshiruvchi organlarning ortiqcha yuklamalardan ozod qilinishi, asosiysi, mazkur sohadagi sud-tergov amaliyoti muammolarining bartaraf etilishiga xizmat qiladi.

Yig‘ilishda “O‘zbekiston Respublikasi adliya organlari tizimi takomillashtirish munosabati bilan O‘zbekiston Respublikasinig ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasi ham muhokamalar markazida bo‘lgan.

Qonun loyihasi bilan intellektual mulk sohasidagi qonunlarga o‘zgartish va qo‘shimchalar kiritilib, Intellektual mulk agentligining vazifalari Adliya vazirligiga yuklatilmoqda.

Shuningdek, Mehnat kodeksiga o‘zgartirish kiritilgan holda, adliya organlariga mehnat nizosini ko‘rish haqidagi ariza bilan sudga murojaat qilish huquqi beriladi.

Fraksiya a’zolari har ikkala qonun loyihasini muhokama qilish jarayonida ulardagi ayrim normalar yuzasidan mutasaddilarga ko‘plab savollar bilan yuzlandi. Qonun loyihalarini yanada takomillashtirish, pishiq-puxta holatga keltirish bo‘yicha tegishli tavsiyalar bergan holda mazkur hujjatlar qo‘llab-quvvatlangan.

• Adliya
• Mehnat
• Oliy Majlis
• Qonun
• Qonunchilik palatasi