Toshkentda Iqtisodiy hamkorlik tashkilotining XVI sammiti arafasida IHTga aʼzo mamlakatlarning biznes uchrashuvi boʻlib oʻtdi. Xalqaro iqtisodiy sheriklikni mustahkamlash yo‘lidagi yana bir muhim qadam bo‘lgan biznes-forum IHTga a’zo davlatlar Savdo-sanoat palatalari, vazirliklari, tegishli idoralari, banklari va xususiy kompaniyalari rahbarlari hamda vakillarini jamladi.

Uning ishida Ozarbayjon, Eron, Qozog‘iston, Qirg‘iziston, Pokiston, Tojikiston, Turkmaniston, Turkiyadan 300 nafardan ortiq delegatlar hamda 300 dan ortiq mahalliy vakillar ishtirok etdilar, ularda vaziyat, shuningdek, savdo-iqtisodiy hamkorlikni kengaytirish va faollashtirish istiqbollari muhokama qilinmoqda.

Ushbu biznes-forumdan ko‘zlangan maqsad IHT mamlakatlari bilan iqtisodiy hamkorlikni faollashtirish, O‘zbekiston tadbirkorlari bilan ushbu tashkilotga a’zo davlatlar o‘rtasida yangi aloqalarni o‘rnatishdan iborat.

Xorijiy ishbilarmon doiralar bilan bunday keng ko‘lamli va ko‘p formatli hamkorlik dunyo hamjamiyati, ishbilarmon doiralar va yirik investorlarning yirik loyihalarni amalga oshirish, samarali hamkorlikni chuqurlashtirish, qit’a chorrahasi sifatidagi mamlakatimiz ulkan salohiyatini ro‘yobga chiqarishdan manfaatdor ekanidan dalolatdir.

So‘nggi yillarda O‘zbekiston va IHT o‘rtasida uzoq muddatli istiqbolda samarali hamkorlik qilish uchun mustahkam zamin yaratib, hamkorlikda ishlash bo‘yicha mustahkam tajriba to‘plandi. Prezidentimiz Shavkat Mirziyoyev rahnamoligida mamlakatimiz har tomonlama sheriklik munosabatlarini qaror toptirishga o‘z hissasini qo‘shish barobarida IHTga a’zo davlatlar bilan ham munosabatlarni muvaffaqiyatli rivojlantirmoqda.

Ta‘kidlash joizki, Sammitning asosiy maqsadlari – Oʻzbekiston hududlari va tarmoqlari salohiyatini namoyish etish, Oʻzbekistonda yangi investitsiya loyihalarini amalga oshirishga IHTga aʼzo mamlakatlar kompaniyalarini jalb qilish, Oʻzbekiston Savdo-sanoat palatasi va Palata oʻrtasidagi institutsional aloqalarni mustahkamlashdan iborat.

• IHT
• Iqtisodiyot
• Toshkent
• sammit