Iroq mart oyida 11,07 milliard dollarlik neft eksport qilgan. Bu haqda Iroq neft vazirligi ma’lum qildi.
 
Vazirlikning qayd etishicha, bu so‘nggi 50 yildagi rekord holat. Rossiyaning Ukrainadagi harbiy amaliyoti ortidan “qora oltin”ning jahon bozoridagi narxi keskin ko‘tarilgan.
 
Bag‘dod daromadlarining 90 foizdan ortig‘i neft daromadlariga bog‘liq va bu davlat g‘aznasiga katta foyda olib keladi.
 
Neft eksport qiluvchi davlatlar tashkilotida (OPEC) yoqilg‘i qazib chiqarish bo‘yicha ikkinchi o‘rinda turuvchi Iroq o‘tgan oyda 100 million barreldan ortiq “qora oltin” sotgan. Fevral oyida mamlakat jami 8.6 milliard dollarlik neft eksport qilgan edi.
 
Ta’kidlanishicha, uglevodorodlardan keladigan daromad hukumat uchun hal qiluvchi ahamiyatga ega, sababi Iroq moliyaviy inqirozga uchragan hamda o‘n yillik urushda vayron bo‘lgan infratuzilmani tiklash uchun pulga muhtoj.
 
Shu bilan birga mamlakatning 41 million aholisi elektr energiyasi yetishmovchiligidan aziyat chekadi. Iroq ulkan neft va gaz zahiralariga ega ekaniga qaramay, Bag‘dod hamon energetik tanqislikka qarshi kurashda importga qaramlikni saqlab qolgan. Xususan, Eron iroqliklarning gaz va elektrga bo‘lgan talabining 30 foizdan ortig‘ini ta’minlaydi, ammo yetkazib berish hajmi tobora kamayib bormoqda.
 
Rossiya 24 mart kuni Ukrainada harbiy amaliyotni boshlaganidan so‘ng, yetkazib berish hajmining kamayib ketish xavfi ortidan neft narxi keskin ko‘tarilib ketdi. Rossiya “qora oltin” eksportida dunyoda Saudiya Arabistonidan so‘ng ikkinchi o‘rinda turadi.
 
31 mart kuni OPEC va uning Rossiya boshchiligidagi ittifoqchilari Gʻarbning neft qazib olishni ko‘paytirish to‘g‘risidagi so‘rovlarini inkor qilib, ishlab chiqarishni arzimas ko‘rsatkichlarda oshirishga kelishib olgan.  Xususan, Saudiya Arabistoni boshchiligidagi 13 davlat va Rossiya yetakchiligidagi 10 davlat may oyidan boshlab kuniga 432 ming barrel neft qazib olishga kelishib olgan – bu avvalgi ko‘rsatkichlardan biroz yuqori.
 
Shuningdek, AQSH bu davlatlardan ishlab chiqarishni ko‘paytirishni so‘ragan. Energoresurslarning narxi ko‘tarilishi butun dunyoda inflyasiya miqdorining ko‘tarilishiga, bu o‘z navbatida pandemiyadan so‘ng qayta tiklanayotgan iqtisodiyotga salbiy ta’sir o‘tkazishiga sabab bo‘lishi mumkin.
 
OPEC Gʻarb talablarini bajarishdan bosh tortgach, Vashington o‘z strategik zahiralaridagi neftni chiqarishga qaror qildi.
 
Qayd etish mumkin, so‘nggi ikki oyda Brent markali neftning bir barreli 140 dollarga yetdi, ammo keyinchalik uning bahosi biroz pasaydi.

• Iroq
• Rossiya
• Ukraina
• neft