Iroq shimolidagi Erbil shahrida 2021-yil 16-dekabr kuni boshlangan kuchli yog‘ingarchilik selga sabab bo‘lgan. Dastlabki ma’lumotlarga qaraganda, kamida sakkiz kishi halok bo‘lgan.

Erbil voliysi Omid Xoshnauning aytishicha, suv toshqinlari katta moddiy zararni keltirib chiqargan. 
Mahalliy Rudaw agentligi xabariga ko‘ra, yetti kishi sel, yana bir kishi yashin urishi oqibatida vafot etgan. Bir necha kishi turli darajada jarohat olgan.  

Ma’lumotlarga ko‘ra, jabrlanganlar va zarar miqdori o‘rganilmoqda.
Shuningdek, fuqaro mudofaasi tashkiloti vakili Sarkavt Karach ko‘pchilik uylarini tark etishga majbur bo‘lganini, bedarak yo‘qolganlarni qidirish ishlari davom etayotganini ma’lum qilgan.

Natijada, yo‘llar balchiqqa botgan, sel mashinalar va avtobuslarni oqizib ketgan. 

Xabarda berilishicha, Xoshnau aholini agar zarurat bo‘lmasa, tashqariga chiqmaslikka undab, yana yog‘ingarchilik kutilayotganini ta’kidlagan.

• Iroq
• Jahon
• Tabiiy ofat